Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonındaǵı máhállelerde puqaralar turmısın jaqsılaw boyınsha alıp barılıp atırǵan jumıslar menen tanısıw maqsetinde usı rayonǵa bardı.

Respublikamız basshısı eń dáslep Bozataw rayonlıq toǵay xojalıǵında bolıp, bul jerdegi júrgizilip atırǵan jumıslar menen tanısıp, «Jasıl mákan» ulıwma milliy joybarı sheńberinde terek egiw hám jasıl belbewlerdi payda etiwde nálxanalardıń ornı ayrıqsha ekenligin atap ótip, nál tayarlaw jumısların keńeytiw boyınsha taraw basshılarına tapsırmalar berdi.
Bunnan soń Joqarǵı Keńes Baslıǵı Qusxanataw elatında 1 kontur 1 ónim baǵdarlaması sheńberinde shańaraqlardı kámbaǵallıqtan shıǵarıw maqsetinde shólkemlestirilgen kooperaciya tárepinen jolǵa qoyılǵan kartoshka hám másh ónimlerin jetistiriw jumısları menen tanıstı.
Sońınan ózleriniń úy aldı qıytaq jerlerinen nátiyjeli paydalanıp, onnan mol ónim alıp atırǵan Bozataw posyolkası turǵınları Qalmambet Jangeldiev, Saǵındıq Baymuratov hám Júginis Jumanazarovtıń jer maydanları hám ıssıxanaları kózden ótkerilip, olardıń jumısları kópshilikke úlgi bolıwı kerek ekenligi atap ótildi.
Sonday-aq, usı aymaqtaǵı Erkindárya kanalındaǵı jaramsız jaǵdayǵa kelip qalǵan piyadalar ótiw ushın arnalǵan kópir boyınsha mashqalanı saplastırıw hám puqaralar ushın qáwipsiz kópir qurıp beriw, «Zarbdor» tájiriybesi tiykarında kanal boyı xızmetin shólkemlestiriw boyınsha juwapkerlerge tapsırmalar berildi.
Sonıń menen birge, Joqarǵı Keńes Baslıǵı rayon orayında jaylasqan Sport mektebinde jaratılǵan sharayatlar menen tanısıp, sportshı jaslar menen de ushırasıp, olar menen jaqınnan pikirlesti.
Xızmet saparı dawamında respublikamız basshısı Bozataw posyolkasında jańadan qurılıp atırǵan 5 qabatlı turaq jay qurılısı, bos turǵan imaratta jańadan jumıs baslaǵan jas isbilermenler tárepinen iske qosılǵan mebel islep shıǵarıw joybarı menen tanıstı. Bazar aymaǵında xalıqqa hám satıwshılarǵa qolaylı sharayat jaratıw boyınsha anıq tapsırmalar berildi.
Bunnan soń Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonında respublikalıq mákeme-shólkemler, rayon belsendileriniń qatnasıwında májilis ótkerdi.
Onda rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı berilgen tapsırmalar boyınsha ilajlar baǵdarlamasınıń orınlanıwı máseleleri qarap shıǵıldı.
Rayondı hár tárepleme rawajlandırıw boyınsha arnawlı baǵdarlama tiykarında bir qatar wazıypalar belgilep berilgen bolıp, mashqalalardı sheshiw maqsetinde húrmetli Prezidentimizdiń arnawlı qararları tiykarında barlıq múmkinshilikler jaratılıp, qarjı derekleri de sheship berilgenligin atap ótiw orınlı. Degen menen, ayırım orınlarda bar múmkinshilikler tolıq iske qosılmay atır.
Sonı da ayrıqsha aytıw kerek, májiliste Bozataw rayonı hám arqa rayonlardı tikkeley Qońırat rayonı menen baylanıstırıwshı ponton kópirin qurıw máselesin úyrenip shıǵıw, rayon aymaǵında avtomobillerge gaz toltırıw kompressor shaqapshasın tez pursatta iske túsiriw boyınsha juwapkerlerge tapsırmalar berildi.
Májiliske Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Qaraqalpaqstan xabar agentligi