Beruniy rayonındaǵı “Niyatulla Azizbek” fermer xojalıǵınıń atız maydanında suwdı únemleytuǵın texnologiyalardı engiziw boyınsha kórgizbeli seminar ótkerildi.

Seminarǵa Qaraqalpaqstan Respublikası Suw xojalıǵı ministri B.Yusupov qatnasıp, awıl xojalıǵı ónimlerin jetistiriwshiler suwdı únemlewshi texnologiyalardan paydalanıwdıń turmıslıq zárúrligi, bul baǵdarda belgilengen wazıypalar hám únemlewshi texnologiyanıń nátiyjeliligine toqtap ótti. Sonıń ishinde, iyiliwsheń qubırlar járdeminde suwǵarıw jumısların shólkemlestiriwde erisiletuǵın nátiyjeler haqqında ámeliy sabaq ótip tiyisli maǵlıwmatlar berildi.
Atap ótilgenindey, mámleketimiz boylap búgingi kúnde suwdı únemleytuǵın texnologiyalar qamtıp alǵan maydan jámi suwǵarılatuǵın maydannıń derlik 25 procentin qurap, bunıń esabınan ótken 2024-jılı 3 milliard kub metr suwdı únemleniwge erisilgen. Bul ilaj nátiyjesinde jumsalǵan suw muǵdarları 830 mıń gektar tákirarıy egin maydanların suwǵarıwǵa baǵdarlandı.
Sonday-aq, ilajda B.Yusupov usı jılı bar suw resurslarınan paydalanıw nátiyjeliligin arttırıw boyınsha belgilep alınǵan tiykarǵı baǵdarlarǵa da toqtap ótip, bar suw resursların suwdan paydalanıwshılar arasında qatań bólistirilgen halda paydalanıw, suwdı únemleytuǵın texnologiyalardı engizgen intakerlerge mámleket tárepinen ajıratılatuǵın subsidiyalar, irrigaciya sistemalarında suw shıǵınların azaytıw jumıslarına ayrıqsha itibar qaratıw zárúrligin atap ótti.
Seminarda Beruniy rayonı “Suw jetkerip beriw xızmeti” mámleketlik mákemesi direktorı J.Eshanovtıń rayonda suwdı únemlewshi texnologiyanı engiziw jumısları boyınsha málimlemesi tıńlandı.
– Maǵlıwmat beriliwinshe, búgingi kúnde Beruniy rayonında 16 intakerdiń 231 gektar maydanında jawınlatıp suwǵarıw, 33 talapkerdiń 507 gektar maydanına tamshılatıp suwǵarıw texnologiyasın engiziw boyınsha shártnamalar rásmiylestirilip, qurılıs jumısları baslanǵanı aytılıp, bul jumıslardı izbe-iz dawam ettiriw ilajları kórilip atırǵanı atap ótildi,-deydi Suw xojalıǵı ministrligi baspasóz xızmetiniń baslıǵı Ǵ.Atajanov.
Seminarda suwdı únemleytuǵın texnologiyalardı engiziw jumısların jedellestiriw tapsırıldı. Sonday-aq, awıl xojalıǵı ónimlerin islep shıǵarıwshılar hám qurılısta jumıstı bólip alıp islewshi kárxanalardıń wákillerine atızlarǵa ornatılıp atırǵan suwdı únemlewshi texnologiyalardı joybar talapları tiykarında sapalı hám óz múddetlerinde ornatıw, sonday-aq, suwdı únemlewshi texnologiyalardı keńnen engiziw jumısların ayrıqsha qadaǵalawǵa alıwı aytılıp, orınlanatuǵın wazıypalar belgilep alındı.
Sonday-aq, fermer hám qurılıs shólkemleriniń wákilleri suwdı únemleytuǵın texnologiyalardı engiziw boyınsha ózlerin qızıqtırǵan sorawlarına juwapkerlerden juwap aldı.

Á.Jiyemuratov,
Qaraqalpaqstan xabar agentligi