Sońǵı jılları elimizde jaslardıń zaman talabına say bilim alıwı hám kásip-óner iyelewi ushın barlıq qolaylı sharayatlar jaratıp berilmekte. Ózlerine jaratılǵan usınday qolaylıqlardan nátiyjeli paydalanıp kiyatırǵan jaslarımız hár qıylı jarıs, tańlaw hám olimpiadalarda joqarı jetiskenlikke erisip, xalqımızdı quwanıshqa bólep kelmekte.

Usınday jaslarımızdıń biri Nókis qalası 1-sanlı qánigelestirilgen mektep-internatınıń 9-klass oqıwshısı Malika Xojamuratova bolıp tabıladı. Atap aytqanda, ol usı jıldıń 11-17-aprel kúnleri Kosova Respublikasında ótkerilgen EGMO – 2025 – Evropa qızlar matematika olimpiadasında qola medalın qolǵa kirgiziwge miyasar boldı.
– Olimpiadaǵa 55 mámleketten 300 ge shamalas oqıwshı qızlar qatnasıp, Ózbekstan saylandı komandası aǵzaları 3 medaldı qolǵa kirgiziwge miyasar boldı,-deydi Malika Xojamuratova .-Solardıń arasında ózimniń de bolǵanımnan oǵada quwanıshlıman. Aldaǵı waqıtları bunnan da jaqsı nátiyjelerdi qolǵa kirgiziwge háreket etemen.
Nókis xalıqaralıq aeroportında xalıqaralıq olimpiadada joqarı nátiyje kórsetken Nókis qalası 1-sanlı qánigelestirilgen mektep-internatınıń 9-klass oqıwshısı Malika Xojamuratova saltanatlı túrde kútip alındı.
Ilajda qatnasqanlar Malikanı xalqımız atınan qızǵın qutlıqladı hám aldaǵı jarıslarında bunnan da joqarı nátiyjelerge erisiwinde tilekleslik bildirdi.
-Kosovodaǵı Olimpiadadan soń Tashkent qalasında ICT4Girls olimpiadasınıń Respublikalıq basqıshı bolıp ótken edi. Nátiyjelerge bola, olimpiadada 12 qız jeńimpaz dep tabıldı,-deydi Nókis qalası 1-sanlı qánigelestirilgen mektep-internatınıń direktorı Marat Ibrayımov-Jeńimpazlar ushın shólkemlestirilgen intensiv treningler juwmaǵında konkurs ótkerilip, 4 qız, solardıń qatarında Malika Xojamuratova 2025-jıl 14-20-iyul kúnleri Germaniyanıń Bonn qalasında bolıp ótetuǵın European Girls’ Olympiad in Informatics (EGOI) – Informatika boyınsha Evropa qızlar olimpiadasında Ózbekstan saylandı komandası quramında qatnasıw ushın jollamaǵa iye boldı. Bul Olimpiada da oqıwshımız jeńimpazlıqtı qolǵa kirgizedi, dep oǵan isenim bildiremiz hám tabıslar tileymiz.

Adilbay Orazov,
Qaraqalpaqstan xabar agentligi sholıwshısı.