«Ózeltexsanaat» associaciyası málimleme xızmetiniń xabarına bola, Saudiya Arabstanınıń «ACWA Power» hám Hindstannıń «L&T Construction» kompaniyalarınıń wákilleri elimizdegi elektrotexnika kárxanalarında boldı.

Onda «ACWA Power» kompaniyasınıń Oraylıq Aziya boyınsha regionallıq direktorı Jon Zaidi, «L&T Construction» kompaniyasınıń ǴMDA mámleketleri boyınsha basshısı Radjan Bancal hám Energetika ministrliginiń juwapkerleri «Enter Steel» hám «Texnopark» kárxanalarınıń jumısı, olardaǵı texnologiyalıq processler, ónimniń sapasın xalıqaralıq standartlarǵa muwapıqlastırıw boyınsha ámelge asırılıp atırǵan jumıslar menen jaqınnan tanıstı.
Sóylesiwler waqtında qurılıp atırǵan quyash elektr stanciyaları ushın zárúr bolǵan metall baǵanalar, metall konstrukciyalar hám basqa da elektrotexnika buyımların jergilikli kárxanalardan satıp alıw máseleleri dodalandı.
Jon Zaidi atap ótkenindey, Ózbekstandaǵı elektrotexnika sanaatı sońǵı jıllarda jedel rawajlanbaqta.
– Biz jergilikli islep shıǵarıwshılar menen birge islesiw hám olardı óz joybarlarımızǵa tartıw imkaniyatların úyrenip atırmız,-dedi ol.
Sóylesiw waqtında «Ózeltexsanaat» associaciyası xalıqaralıq baylanıslar basqarmasınıń baslıǵı Mansur Mirtojiev bul tanısıw tárepler arasındaǵı birge islesiwge keń jol ashatuǵının atap ótti.
– Xalıqaralıq investor hám jumıstı bólip alıp islewshilerdiń kárxanalarımızǵa qızıǵıwshılıǵı jergilikli óndiristiń potencialına berilgen úlken isenim bolıp esaplanadı. Bul birge islesiw tek ǵana eksport imkaniyatların keńeytip qoymastan, jańa texnologiyalardı tartıw hám jergilikli jumıs orınların jaratıwǵa da sharayat jaratadı,-dedi ol.
Áhmiyetlisi, bul sapar etiw Ózbekstannıń «jasıl» energetika tarawında xalıqaralıq sherikler menen óz-ara paydalı birge islesiwdi keńeytiw jolındaǵı jáne bir ámeliy qádem bolıp esaplanadı.

N.Ziyodullaeva ÓzAnıń xabarshısı