Sońǵı jılları elimizde sport tarawın rawajlandırıw, jaslardıń sport penen shuǵıllanıwına keń imkaniyatlar jaratıp beriw baǵdarında kóplegen unamlı jumıslar ámelge asırılmaqta. Bunıń nátiyjesinde mámleketimiz sportshıları xalıqaralıq jarıslar hám Olimpiada oyınlarında jeńimpazlıqtı qolǵa kirgizip, bayraǵımızdı kóklerde jelbiretpekte.

Usınday sportshılarımız qatarında grek-rim gúresi boyınsha 2 márte Aziya chempionı, Aziya oyınları, Islam tilekleslik oyınları jeńimpazı, jáhán chempionatınıń qola hám gúmis medalı iyesi, Olimpiada oyınlarınıń qatnasıwshısı Jalǵasbay Berdimuratov hám qılıshlasıw sportı boyınsha jáhán kuboginiń qola medalı iyesi, Aziya kubogi jeńimpazı, Olimpiada oyınlarınıń qatnasıwshısı Sherzat Mamutovlardıń atların ayrıqsha atap ótiw orınlı.
Pútkil dúnyaǵa belgili xalqımızdıń usınday súyikli sportshıların keń jámiyetshilikke jaqınnan tanıstırıw hám student-jaslar arasında sporttı keńnen úgit-násiyatlaw maqsetinde, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında ushırasıw keshesi shólkemlestirildi.
Kesheni filial direktorınıń jaslar máseleleri hám ruwxıy-aǵartıwshılıq isleri boyınsha birinshi orınbasarı Hamza Abdijaliev kiris sóz benen ashıp, Prezidentimizdiń basshılıǵında jaslarǵa jaratılıp atırǵan qolaylı sharayatlar hám elimiz sportshılarınıń xalıqaralıq jarıslarda qolǵa kirgizip atırǵan tabısları haqqında aytıp berdi. Ushırasıwda ataqlı palwanımız Jalǵasbay Berdimuratovtıń ustazı Ruslan Ernazarov, Jalǵasbay Berdimuratov hám Sherzat Mamutovlar elimizde sport tarawına qaratılıp atırǵan itibar hám jaslardı qollap-quwatlaw boyınsha islenip atırǵan jumıslardı maqtanısh penen aytıp ótip, ózleriniń qolǵa kirgizgen nátiyjeleri usınday ǵamqorlıqtıń arqasında ekenligine toqtap ótti.
Sonıń menen birge, ustazlarınıń úyretken usılların jalıqpastan úyrense dúnya arenalarında joqarı orınlardı iyelew múmkin ekenligin ózleriniń ómiri mısalında aytıp berip, student-jaslardı sport penen turaqlı shuǵıllanıwǵa shaqırdı.
Keshede studentler tárepinen keshe miymanlarına bir qatar sorawlar berilip, olarǵa juwap aldı.
Ilaj sońında chempion sportshılar hám olardıń ustazlarına filial hákimshiligi tárepinen tayarlanǵan estelik sawǵalar tapsırıldı.

Adilbay Orazov,
Qaraqalpaqstan xabar agentligi sholıwshısı