«Talimarjan ÍES» AJ baslaması menen ǴXQ wákilleri ushın shólkemlestirilgen press-tur dawamında bul haqqında tolıq maǵlıwmat berildi hám qurılıs processleri menen jaqınnan tanıstı.

Bul akcionerlik jámiyetinde investiciyalıq joybar tiykarında Ispaniyanıń «Intecsa Ingeniera Industrial» S.A. hám Yaponiyanıń «Mitsubishi Corporation» sırt el kompaniyaları menen birgelikte ámelge asırılıp atırǵan 1065 MVt quwatlılıqqa iye gezektegi 3-hám 4-puw-gaz qurılmalarınıń qurılıs processleri alıp barılıp atırǵanın atap ótiw kerek.
Bul iri investiciyalıq joybar mámleketimiz basshısınıń 2020-jıl 18-dekabrdegi «Talimarjan ÍES» AJda ulıwma quwatlılıǵı 900 megavattan kem bolmaǵan gezektegi 2 puw-gaz qurılmaların qurıw arqalı keńeytiw investiciyalıq joybarın ámelge asırıw ilajları haqqında»ǵı qararı tiykarında ámelge asırılıp atırǵan bolıp, joybardıń ulıwma bahası derlik bir million AQSh dolların quraydı.
Bul joybardıń qarjı dáregi sıpatında dúnyanıń eń jetekshi qarjı kompaniyaları Aziya rawajlanıw banki hám Evropa tikleniw hám rawajlanıw banki, Ózbekstan Respublikası tikleniw hám rawajlanıw qorınıń kredit qarjıları tárepinen qarjılandırılmaqta. Bas jumıstı bólip alıp islewshi sıpatında «Intecsa Ingeniera Industrial» S.A hám «Mitsubishi Corporation» kompaniyaları qatarında qurılıs jumıslarına Túrkiyanıń «Çalik Enerji» kompaniyası da tartılǵan.
Áhmiyetlisi, bul puw-gaz qurılmaları iske qosılǵannan soń, kárxananıń óndirislik quwatlılıǵı sezilerli dárejede artadı hám mámlekette elektr támiynatı jáne de turaqlasadı. Nátiyjede stanciya tárepinen jılına qosımsha 8 milliard kVt saat elektr energiyası islep shıǵarıladı hám joqarı únemlewshi texnologiyalardı qollanıw esabınan jılına 600 million kub metr tábiyǵıy gazdiń únemleniwine erisiledi.
Investiciyalıq joybar usı jıldıń aqırına shekem tolıq quwatlıqlarda mámleketimizdiń energetika sistemasına elektr energiyasın jetkerip beriwdi baslawı rejelestirilgen. Puw-gaz qurılmaları iske qosılǵannan soń, kárxanada qosımsha 120 ǵa shamalas jumıs ornı jaratıladı hám bul puw-gaz qurılmaları esabınan elektr stanciyasınıń ulıwma zamanagóy quwatlılıqları 1965 MVt ǵa jetkeriledi.
Házirgi waqıtta kárxanada jańadan qurılıp atırǵan 3-hám 4-puw-gaz qurılmalarınıń puw jáne gaz turbinalarınıń generatorları hám párigi ornatılǵan bolıp, olar Yaponiya, Koreya, Qıtay, Italiya sıyaqlı jetekshi mámleketlerdiń kompaniyaları tárepinen jetkerip berilgen.
Maǵlıwmat ornında, házirgi waqıtta stanciyada ulıwma quwatlılıǵı 900 megavatt bolǵan 1-hám 2-puw-gaz qurılması turaqlı islep tur. Bul qurılmalar 2016-2017-jılları iske qosılǵan bolıp, jılına 7,2 milliard kVt saat elektr energiyasın jetkerip beredi.

ÓzA