Ózbekstan Ekologiyalıq partiyası Qaraqalpaqstan Respublikası partiya shólkemi Keńesi tárepinen Berdaq atındaǵı Qaraqalpaq mámleketlik universitetinde, Prezident Sh.Mirziyoevtiń basshılıǵında usı jıl 14-fevral kúni bolıp ótken jaslar menen sóylesiwi hám mámleketimizde jaslarǵa berilgen imkaniyatlardı hám ushırasıwda berilgen usınıslardı jetkeriw maqsetinde jaslardıń qatnasıwında “ashıq sáwbetlesiw” ilajı bolıp ótti.

Onda Joqarǵı Keńes deputatları, Jaslar parlamenti aǵzaları, “Ekologiya hám salamatlıq” hayal-qızlar klubınıń aǵzaları, “Jas ekologlar” qanatı, partiya belsendileri, professor-oqıtıwshılar hám student-jaslar qatnastı.
Ilajda shıǵıp sóylegenler bunnan bes jıl aldın Oliy Majlis Senatı hám Nızamshılıq palatasında Jaslar parlamenti shólkemlestirilgenligi, onda jaslar siyasiy jetekshilik, demokratiya mektebi, parlamentarizm mektebi qanday bolıwın ámelde kórgenligi, sońǵı saylawda usı jaslarımızdan ekewi Nızamshılıq palatasına, 250 i keńeslerge deputat bolıp saylanǵanlıǵı haqqında maǵlıwmatlar berdi.
Mámleketimiz basshısı sóziniń basında bul ushırasıwdan quwanıshlı ekenin atap ótip, jaslardı xalqımızdıń altın fondı, dep ataǵan edi. Ózbekstan xalqınıń 60 procentin jaslar quraydı. Hár jılı miynet bazarına 600 mıńnan artıq jigit-qızlar kirip kelmekte. 2030-jılǵa barıp, bul kórsetkish 1 millionǵa jetedi.
Jaslar máselesi parlament hám jergilikli keńes deputatlarınıń jumısında da áhmiyetli baǵdar sıpatında qaralıwı kerek ekenligi atap ótildi.
Jaslarǵa baylanıslı nızam joybarların Jaslar parlamenti aǵzaları menen birge dodalaw hám jalpı májiliste joybar boyınsha jaslar wákilleriniń pikirin de tıńlaw maqsetke muwapıq ekenligi atap ótildi.
Sonday-aq, jergilikli keńes sessiyalarında jaslar máseleleri boyınsha juwapker uyım basshılarınıń málimlemesin tıńlaw, barlıq jergilikli keńeslerdiń janında jaslar toparların shólkemlestiriw baslamaları da alǵa qoyıldı.
Mámleketimiz basshısınıń atap ótkenindey, jaslarda tábiyatqa mehirdi arttırıw, qorshaǵan ortalıqtı qorǵawǵa qaratılǵan joybarların qollap-quwatlaw ushın “Jasıl baslamalardı qollap-quwatlaw qorı” shólkemlestiriledi.
Sóylesiw dawamında búgingi kúnde jaslar arasında ekologiyalıq bilimlendiriw hám mádeniyattı arttırıw, ekologiya hám qorshaǵan ortalıqtı qorǵawda jaslardıń qatnasıwı hám belsendiligin támiyinlew boyınsha bir qatar túsinikler berildi hám jaslar ózleriniń pikir-usınısların bildirdi.

Qaraqalpaqstan xabar agentligi