Aldın xabar berilgenindey, házirgi waqıtta Densawlıqtı saqlaw ministrligi tárepinen elimiz boylap «Sawallandırıw aylıǵı» ilajları dawam etpekte. Prezidentimizdiń qollap-quwatlawı menen xalıqaralıq grantlar hám sırtqı biyǵárez qarjılardı keńnen tartıwǵa da ayrıqsha itibar qaratılmaqta.

Usı ilajlar sheńberinde sociallıq qorǵawǵa mútáj, kámbaǵallıq reestrine kirgizilgen puqaralar arasında keselliklerdi erte anıqlaw hám nawqaslardı jasaytuǵın aymaǵınıń ózinde mámleket esabınan sawallandırıw ilajlarına Kuveyt mámleketiniń «Al-amal» xalıqaralıq xirurgler toparı da óziniń gumanitarlıq missiyası menen qatnasıw ushın respublikamızǵa kelgen edi.
Házirgi waqıtta orınlarda Kuveyt mámleketiniń sırtqı biyǵárez qarjıları tiykarında biypul operaciyalar ótkerilmekte.
Atap aytqanda, Respublikalıq qánigelestirilgen Kardiologiya, Kóz mikroxirurgiyası oraylarınıń regionallıq filialı hám balalar medicinalıq oraylarında – Kuveyt mámleketiniń «Al-amal» xalıqaralıq xirurgiyalıq toparlarınıń shıpakerleri tárepinen puqaralar medicinalıq tekseriwlerden ótkerilip, operaciyalar ámelge asırılmaqta.
Bul baǵdardaǵı ilajlar orınlarda nátiyjeli dawam etpekte.

Qaraqalpaqstan xabar agentligi