Málimleme hám ǵalaba kommunikaciyalar agentliginde usı jıldıń may-iyul aylarında ótkeriletuǵın Puqaralar jıyını baslıǵı saylawların shólkemlestiriw hám ótkeriw máselelerine baǵıshlanǵan brifing bolıp ótti.

Ózbekstan máhálleleri associaciyası málimleme xızmetiniń baslıǵı Jobir Asqarov bul juwapkershilikli process haqqında tolıq maǵlıwmat berdi.
Atap ótilgenindey, búgingi kúnde mámleketimiz máhálleleri elimizde bolıp atırǵan jańalanıw processlerin háreketke keltiriwshi tiykarǵı kúshke aylandı. Usı jıldıń may-iyul aylarında elimiz boylap úlken siyasiy ilaj – máhálle baslıqlarınıń saylawı bolıp ótiwi ayrıqsha áhmiyetke iye. Saylawlar 1-may sánesinen baslanadı.
Usı múnásibet penen mámleketimizdegi ámeldegi 9 mıń 452 máhállede saylawlardı joqarı dárejede shólkemlestiriw boyınsha jedel jumıslar ámelge asırıldı.
Prezidentimizdiń sózi menen aytqanda, búgin barlıq reformalar máhállede bolmaqta. Máhálleniń kelbeti ózgerip, adamlarımızdıń dárti hám táshwishleri máhálleniń ózinde sheshilmekte.
Solay eken, bıyılǵı máhálle baslıqlarınıń saylawın jańasha demokratiyalıq principler tiykarında, ashıq-aydınlıq, puqaralarımızdıń tilegin, erk-ıqrarın erkin bildiriw principlerine sáykes tárizde ótkeriw boyınsha barlıq kúsh hám imkaniyatlar jumsalmaqta.
Bizge belgili, bıyıl Ózbekstan Respublikasınıń «Puqaralar jıyını baslıǵın saylaw haqqında»ǵı nızamına ózgerisler hám qosımshalar kirgizildi. Jańa redakciyadaǵı nızamǵa bola, endi mákan puqaralar jıyını baslıqlarınıń wákillik múddeti 5 jılǵa sozdırıldı.
Jıldıń basınan may-iyul aylarında ótkeriletuǵın máhálle baslıqları saylawına qızǵın tayarlıq jumısları ámelge asırıldı.
Máhálleler associaciyasında Respublikalıq shtab, 14 aymaqta jáne 208 rayon hám qalalarda máhálle baslıqları saylawın shólkemlestiriw hám ótkeriwge járdemlesiwshi komissiyalar janında Shtablardıń jumısı jolǵa qoyıldı. Járdemlesiwshi komissiyalardıń máhálle baslıqların saylawǵa baylanıslı 32 túrdegi hújjetlerdiń joybarı tayarlanıp, aymaqlarǵa jetkerildi.
Máhálle baslıǵın saylawdı shólkemlestiriw hám ótkeriw processlerin ǵalaba xabar qurallarında sáwlelendiriw boyınsha media-reje islep shıǵıldı.
Saylaw ótkeriletuǵın kún, waqıt hám orın haqqındaǵı maǵlıwmatlar Ózbekstan máhálleleri associaciyasınıń rásmiy veb-saytına jaylastırılıp barılmaqta.
Saylawlar ótkeriletuǵın orınlarǵa talabanlar hám saylawǵa tiyisli maǵlıwmatlar stendleri ornalastırıldı.
14 aymaqta Keńeslerdiń sessiyaları ótkerilip, máhálle baslıqları saylawın shólkemlestiriw hám ótkeriwge járdemlesiwshi Qaraqalpaqstan Respublikası, wálayatlar hám Tashkent qalası komissiyaları (jámi 338 aǵzadan ibarat) hám ilajlar rejesi tastıyıqlandı. 208 rayonlıq (qalalıq) Keńesler sessiyalarınıń qararı menen puqaralar jıyınları baslıqlarınıń saylawın shólkemlestiriw hám ótkeriwge járdemlesiwshi rayonlıq hám qalalıq komissiyalar tastıyıqlandı.
May-iyul aylarında bolıp ótetuǵın saylawlarda jumısshı toparlar tárepinen 208 rayon(qala)lıq járdemlesiwshi komissiyalardıń qararı menen máhállelerde wákillerdiń sanı belgilendi. Saylawda 2 million 591 mıń 823 wákil qatnasıwı kútilmekte.
Bul saylawlarda elimiz puqaraları belsene qatnasıp, hár bir kóshe, gúzar, máhálleniń abadanlıǵına óz úlesin qosıwı áhmiyetli bolıp tabıladı.

Nazokat USMONOVA,
ÓzAnıń xabarshısı