Salıq basqarmasınıń maǵlıwmatlarına qaraǵanda, bıyılǵı jıldıń birinshi shereginde Qaraqalpaqstanda rásmiy jumısta bolmaǵan 4242 puqara rásmiy jumısqa ornalastırıldı.

Salıq xızmeti tárepinen 2025-jıldıń birinshi shereginde 4158 jumısshını rásmiylestiriw rejelestirilgen.
Usı jıldıń 3 ayı dawamında 1244 kárxanada rásmiy jumısta bolmaǵan 4242 xızmetkerdiń rásmiylestiriliwine erisildi.
Tarawlar kesiminde alıp qaralǵanında, xızmet kórsetiw kárxanalarında 2215, sawda hám ulıwma awqatlanıw kárxanalarında 545, óndirislik kárxanalarda 444, qurılıs kárxanalarında 94, awıl xojalıǵı tarawı kárxanalarında 944 xızmetker rásmiylestirildi.
Álbette, salıq uyımları tárepinen puqaralardıń kárxanalarda rásmiy túrde jumıs islewi ushın ámelge asırılıp atırǵan bunday ilajlar sebepli, puqaralar rásmiy túrde jumıs islese, olardıń aylıq miynet haqıları óz waqtında boladı, bayramlarda xoshametlew sıylıqların ala aladı, miynet dem alısı, sawallandırılıwı támiyinlenedi hám basqa da huqıqıy mápleri qorǵaladı.
Salıq xızmeti uyımları tárepinen orınlarda “konvert” usılında jumıs islewshilerdiń jumısların rásmiylestiriw jumısları dawam etpekte.

Á.Jiyemuratov,
Qaraqalpaqstan xabar agentligi