Házirgi waqıtta Densawlıqtı saqlaw ministrligi tárepinen elimiz boylap «Sawallandırıw aylıǵı» ilajları ótkerilmekte.

Usı ilaj sheńberinde sociallıq qorǵawǵa mútáj, kámbaǵallıq reestrine kirgizilgen xalıq arasında keselliklerdi erte anıqlaw hám nawqaslardı jasaytuǵın aymaǵınıń ózinde mámleket esabınan sawallandırıw ilajları da kórilmekte.
Bul akciyada Kuveyt mámleketiniń «Al-amal» xalıqaralıq xirurgler toparı da óziniń gumanitarlıq missiyası menen qatnaspaqta. Bul – eki mámleket basshıları tárepinen jolǵa qoyılǵan hám barǵan sayın bekkemlenip atırǵan óz-ara doslıq birge islesiw qatnasıqlarınıń ámeliy nátiyjesi bolıp esaplanadı.
Elimizge kelgen 40 tan aslam eń tájiriybeli sırt el qánigeleri Nókis qalasına jetip keldi.
«Al-amal» xalıqaralıq xirurgler toparı bir hápte dawamında Qaraqalpaqstan Respublikasında boladı.
Usı tiykarda Aralboyı regionında jaylasqan rayon hám qalalarda sociallıq qorǵaw reestrine kirgizilgen, sonıń ishinde, joqarı texnologiyalıq xirurgiyalıq operaciya ótkeriwge mútáj 300 ge shamalas balalar, hayal-qızlar hám er adamlardıń salamatlıǵı bekkemlenedi.
Atap aytqanda, bul jerde medicinanıń onlaǵan baǵdarı boyınsha qayırqomlıq túrinde orınlanatuǵın operaciyalar Respublikalıq qıstawlı járdem ilimiy orayı, Respublikalıq qánigelestirilgen Kardiologiya, Onkologiya hám radiologiya jáne Kóz mikroxirurgiyası oraylarınıń regionallıq filialları, sonday-aq, Respublikalıq kóp tarmaqlı eresekler hám balalar medicina oraylarında ótkeriliwi belgilengen.
Bunıń ushın belgilengen mánzillerdegi medicina mákemelerinde zárúr sharayatlar jaratılǵan.

Qaraqalpaqstan xabar agentligi