Apatshılıqlar pútkil jer betin, insaniyattıń táǵdirin ózgertip jiberiwi múmkin. Bunday qorqınıshlı hám ayanıshlı apatshılıqlar qatarında CHernobıl apatshılıǵı, yaǵnıy, 1986-jıl 26-aprelde Ukrainanıń Pripyat qalası janında jaylasqan CHernobıl AES tiń 4-reaktorı jarılıwı aqıbetinde júz bergen insaniyat tariyxındaǵı eń qorqınıshlı apatshılıqlardıń biri boldı. Jarılıw nátiyjesinde reaktor tolıq wayran boladı hám qorshaǵan ortalıqqa úlken muǵdardaǵa radioaktiv nurları tarqalǵan. CHernobıl apatshılıǵınan keyin 600 mıńnan aslam jumısshı jarılıw aqıbetleriniń aldın alıw hám saplastırıw islerine mobilizaciyalanadı.

Bıyıl sol ayanıshlı waqıyanıń júz bergenine 39 jıl tolmaqta. Taqıyatas rayonında sol apatshılıq júz bergen aymaqta qutqarıw jumıslarına qatnasqanlar hám olardıń shańaraq aǵzaları menen bir kese chay ústinde sáwbetlesiw keshesi bolıp ótti. Ilajda «Nuraniy» qorı Taqıyatas rayonı bólimi baslıǵı A.Ersaidov qatnasıp, elimizdegi tınıshlıq, abadan turmıs hám tarawlarda erisilip atırǵan tabıslar haqqında sóz etip, qatnasıwshılarǵa óziniń jaqsı tileklerin bildirdi. Mobilizaciyalanǵanlardıń arasında kópshiligi sol jerden túrli kesellikler menen nawqaslanıp qaytıp kelip, búgingi kúnde olarǵa mámleket tárepinen járdemler kórsetilip kelinbekte.
Tariyxqa aylanǵan sol kún qayǵısınıń zıyanı usı kúnge shekem saqlanıp qalǵan. Qutqarıw jumıslarında belsendilik kórsetken chernobılshılar búgingi turmısımızǵa shúkirshilik bildirmekte.

Qaraqalpaqstan xabar agentligi