Kegeyli rayonındaǵı Júzimbaǵ awıl puqaralar jıyınında xalıqtıń qıytaq jer hám ijara jerlerinen nátiyjeli paydalanıw arqalı dáramatın arttırıw hám shańaraqlıq bántlikti támiyinlew máselelerine arnalǵan kórgizbeli seminar bolıp ótti.
Seminarǵa rayon basshıları, aymaq belsendileri hám turǵınları qatnastı.

Ilajda Qaraqalpaqstan Respublikası Ministrler Keńesi Baslıǵınıń birinshi orınbasarı Nurullan Erlepesov hám basqalar shıǵıp sóylep, sońǵı jılları elimizde Prezidentimizdiń basshılıǵında xalıqtıń bántligin támiyinlew, olardı isbilermenlikke tartıw hám sol arqalı abadanlıqtı arttırıw baǵdarında ámelge asırılıp atırǵan ilajlar haqqında keń túrde aytıp ótip, sonıń ishinde, puqaralarımızdıń ózleriniń úy aldı qıytaq jerlerinen paydalanıw zárúrligine toqtap ótti.
Kórgizbeli seminar usı aymaqta jasawshı puqara Dármenbay Ibatovtıń shańaraǵında ótkerilip, olardıń shańaraqtaǵı jumıs tájiriybesi arqalı házirgi kúnde qıytaq jerden aqılǵa uǵras paydalanǵan halda qalay etip qosımsha dáramat tawıp, turaqlı bántlikti támiyinlew múmkin ekenligi kórsetip berildi.
-2022-jılı subsidiya tiykarında 5,4 mln sumǵa 2 sotıxlıq ıssıxana satıp alıp bergen edik,-deydi aymaqtaǵı hákim járdemshisi Azamat Maǵzamov.-Dármenbay bul imkaniyattan nátiyjeli paydalanıp, onnan dáramat taptı. Sońınan bizler oǵan 2023-jıldıń mart ayında zamanagóy multikultivator satıp alıwı ushın kommerciyalıq bankten 5 mln sumlıq jeńilletilgen kredit alıp berdik. Bul kreditti de sentyabr ayında tolıq jawıp, óziniń iskerligin kórsetti. Bunnan soń shańaraq iyesi Dármenbaydıń óziniń atına 33 mln, kelinsheginiń atına 10 mln sum jeńilletilgen kredit shıǵarıp, 8 sotıx ıssıxana satıp alıwına járdemlestik. Ajıratılǵan qarjılar tiykarında shańaraqta 10 sotıx qıytaq jerge ıssıxana shólkemlestirilip, shańaraqlıq isbilermenlik jolǵa qoyıldı. Bul bolsa, tek ǵana úy xojalıǵınıń dáramat dáregin keńeytpesten, al, shańaraqlıq bántlikke de jol ashtı.
Álbette, bunday baslamalar awıl xalqınıń turmıs dárejesin jaqsılawǵa, isbilermenlik mádeniyatın qáliplestiriwge hám azıq-awqat qáwipsizligin támiyinlewge xızmet etedi.
Hákim járdemshileri tárepinen orınlarda hár bir shańaraqtıń jaǵdayı úyrenilip, olardıń imkaniyatlarınan kelip shıǵıp individual qatnas tiykarında finanslıq hám ámeliy járdem kórsetiliwi áhmiyetli nátiyjeler bermekte. Qıytaq jerler bolsa, hár dayım dáramat dáregi sıpatında xalqımızǵa xızmet ete beredi.

Adilbay Orazov,
Qaraqalpaqstan xabar agentligi sholıwshısı.