Oliy Majlis Senatı tárepinen jergilikli Keńeslerdiń turaqlı komissiyaları aǵzalarınıń bilim hám kónlikpelerin arttırıw, nızamshılıqtaǵı jańalıqlar haqqında xabardarlıǵın kúsheytiw hám óz-ara birge islesiwdi rawajlandırıw maqsetinde sistemalı jumıs alıp barılmaqta.

Usı maqsette usı jıldıń 23-25-aprel kúnleri Qaraqalpaqstan Respublikası Joqarǵı Keńesi, xalıq deputatları wálayatlıq hám Tashkent qalalıq Keńesleri turaqlı komissiyalarınıń basshıları ushın Oliy Majlis Senatında ámeliyat shólkemlestirildi.
Ámeliyat dawamında Senat komitetleriniń jumısı menen jaqınnan tanıstı, jergilikli Keńesler arasındaǵı birge islesiwdi bekkemlew, aymaqlardıń sociallıq-ekonomikalıq rawajlanıwına baylanıslı áhmiyetli máselelerdi kórip shıǵıwda jergilikli wákillikli uyımlardıń qatnasıwı nátiyjeliligin arttırıw máseleleri dodalandı.
Nızam dóretiwshiligi procesine jergilikli Keńes deputatların keńnen tartıw, olardıń pikir-usınısların esapqa alıw, sonday-aq, qabıl etilip atırǵan nızamlarda aymaqlıq ózgeshelik hám imkaniyatlardı sáwlelendiriw boyınsha ámeliy kónlikpeler qáliplestirildi.
Bunnan tısqarı, turaqlı komissiyalardıń basshıları ushın Senattıń Agrar, suw xojalıǵı máseleleri hám ekologiya komitetiniń baslaması menen oqıw seminarı ótkerildi.
Seminarda Senat tárepinen islep shıǵılǵan metodikalıq qollanba tanıstırıldı. Sonday-aq, turaqlı komissiyalardıń jumısın nátiyjeli shólkemlestiriw, tiykarǵı baǵdarlar boyınsha anıq rejeler belgilew hám wákillikler sheńberinde áhmiyetli máselelerdi dodalaw máselelerine itibar qaratıldı.
Bul ámeliyat hám seminarlar jergilikli Keńesler hám Senat komitetleri arasındaǵı óz-ara birge islesiwdi bunnan bılay da bekkemlew, jergilikli hákimiyat uyımları menen islesiwde nátiyjelilikti arttırıw hám jergilikli atqarıw hákimiyatı ústinen tásirsheń parlamentlik qadaǵalawdı támiyinlewge xızmet etedi.

Qaraqalpaqstan xabar agentligi