Usı kúnlerde Qıtay Xalıq Respublikasınıń Urumchi qalasında Shanxay birge islesiw shólkeminiń siyasiy partiyalar forumı bolıp ótpekte. Bul forumnan gózlengen maqset – ShBSh ruwxın kórsetiwde siyasiy partiyalardıń rolin arttırıw hám siyasiy partiyalar arasındaǵı birge islesiwdi bunnan bılay da kúsheytiw, óz-ara tájiriybe almasıwdan ibarat.
Partiyalar forumında 26 mámlekettiń 60 tan aslam siyasiy partiyalarınıń basshıları, deputatları hám wákilleri qatnaspaqta. Ózbekstandaǵı siyasiy partiyalardıń wákilleri de bul ánjumanǵa qatnasıp, hár qıylı baǵdar hám temalardaǵı sessiyalarda óz bayanatları menen shıqpaqta.
Sonıń ishinde, “Milliy tiklanish” demokratiyalıq partiyası frakciyası baslıǵınıń orınbasarı Nodir Tilavoldiev “Modernizaciyaǵa erisiw jolında civilizaciyalararalıq sóylesiw hám óz-ara tájiriybe almasıw procesin bekkemlew” temasında shıǵıp sóylep, búgin zamanagóy rawajlanıw tek ǵana materiallıq baylıq hám texnologiyalıq ósiw menen belgilenbeytuǵının, tiykarǵı norma – insan qádiri, mádeniyatlararalıq keńpeyillik, globallıq birge islesiw hám óz-ara túsinisiw sıyaqlı qádiriyatlarǵa súyenetuǵının atap ótti.
Xalıq demokratiyalıq partiyası baslıǵınıń orınbasarı Firdavs Sharipov bolsa partiyanıń programmalıq baǵdarınan kelip shıqqan halda mámleketimizde xalıqtı sociallıq qorǵaw boyınsha ámelge asırılıp atırǵan reformalar, bul baǵdardaǵı tájiriybe hám birge islesiw perspektivaları haqqında bayanat jasadı.
Shanxay birge islesiw shólkemi siyasiy partiyalar forumı óz-ara tájiriybe almasıw, birge islesiw baylanısların bekkemlewde áhmiyetli siyasiy platforma wazıypasın atqaradı.
M.Komilova, ÓzA