«Aymaqlıq elektr tarmaqları» akcionerlik jámiyeti Qaraqalpaqstan aymaqlıq filialında respublikamızda háreket etip turǵan ǵalaba xabar qurallarınıń wákilleri hám blogerler ushın press-tur shólkemlestirildi.

Ilajdan gózlengen tiykarǵı maqset-tutınıwshılarǵa kórsetilip atırǵan xızmettiń sapasın jaqsılaw hám tarmaqlarda elektr energiyası shıǵınlarınıń aldın alıw baǵdarında ámelge asırılıp atırǵan jumıslar menen jaqınnan tanıstırıw bolıp tabıladı.
Usı máselelerge qızıǵıwshılıq bildirgen ǵalaba xabar wákilleri Nókis qalasınıń bir qatar mákan puqaralar jıyınları aymaǵında júrgizilip atırǵan rekonstrukciya-modernizaciya jumısların kózden ótkerdi.
Sonıń menen birge, bul aymaqlardaǵı filialdıń juwapker xızmetkerleri, Nókis qalalıq elektr támiynatı basshıları hám xızmetkerleri, sonday-aq, jıyın baslıqları hám aymaqta jasawshı puqaralar menen sáwbetlesip, ózlerin qızıqtırǵan sorawlarına juwap aldı.
-Sońǵı jılları elimizde xalıqtıń abadan turmısta jasawı ushın barlıq qolaylı sharayatlar jaratılıp berilmekte,-deydi «Aymaqlıq elektr tarmaqları» akcionerlik jámiyeti Qaraqalpaqstan aymaqlıq filialınıń bólim baslıǵı Quwatbay Artıqbaev.- Ásirese, Ѳzbekstan Respublikası Prezidentiniń 2024-jıl 23-sentyabrdegi «Kámbaǵallıqtan abadanlıqqa qaray baǵdarlamasın ámelge asırıw boyınsha birinshi gezektegi ilajlar haqqında»ǵı qararı xalqımızdıń turmısında áhmiyetli orın tutpaqta. Prezident qararı tiykarında respublikamız boyınsha jámi 96 puqaralardıń ózin-ózi basqarıw uyımlarında hár qıylı turmıslıq mashqalalar anıqlanıp, olar awır aymaqlar dizimine kirgizildi. Sonnan 87 máhállede elektr energiyasın jetkerip beriwde kemshilikler bar ekenligi belgili boldı. Bul kemshiliklerdi saplastırıw maqsetinde, 2025-jılı 9 356 dana temir beton baǵanaları, 398,1 km uzınlıqtaǵı 0,4-6-10 kV elektr uzatıw tarmaqları hám 88 dana transformator punktlerine rekonstrukciya hám jańa qurılıs jumısların islew rejelestirildi. Búgingi kúni ámelde 2 189 dana temir beton baǵanaları hám 7,8 km aralıqtaǵı elektr uzatıw tarmaqları tartıldı.
-Aymaǵımızda 1575 xojalıqta 7700den aslam xalıq tınısh-tatıw jasamaqta,-deydi “Qutlı mákan” mákan puqaraları jıyını baslıǵı Zamira Qutlımuratova.-Sońǵı jılları Prezidentimizdiń arnawlı qararları tiykarında, kóshelerimiz ońlanıp, ishimlik hám aqaba suw tarmaqları menen támiyinleniw jaqsılandı. Elektr energiyası menen támiyinlew máselesinde, “Keneges”, “Gúzar” hám “A.Óteniyazov” kóshelerinde bir qatar mashqalalar bar edi. Bıyılǵı jılı bul mashqalalardı unamlı saplastırıw maqsetinde, usı kóshelerdegi bunnan 40-50 jıl burın qurılǵan eski baǵana hám elektr liniyaları jańa beton baǵanalar hám siv kabellerge almastırılmaqta. Bunıń ushın elimiz basshılarına, elektr támiynatı xızmetkerlerine úlken raxmet aytamız.
-Bizler 1980-jıllardıń basında kóship kelgen edik,-deydi “Keneges” kóshesi turǵını Jalǵasbay Ótegenov.-Ayırım samal bolǵan kúnleri tereklerdiń elektr liniyalarına tiyiwi nátiyjesinde, úylerimizde tok óship qalar edi. Mine bıyıl kóshemizdegi elektr tarmaqlarına ońlaw jumısları júrgizilip atır. Endi burınǵı mashqalalar baqlanbaydı dep quwanıp atırmız.
«Aymaqlıq elektr tarmaqları» akcionerlik jámiyeti Qaraqalpaqstan aymaqlıq filialı tárepinen bunday iygilikli isler pútkil respublikamız boylap dawam etpekte.

Adilbay Orazov,
Qaraqalpaqstan xabar agentligi sholıwshısı.