Usı jıl 24-aprel kúni Nókis rayonı Málimleme-kitapxana orayında “Ózbekstan kitapqumarlar eli” V Respublikalıq “Kitapqumarlıq hápteligi” sheńberinde Mektepke shekemgi hám mektep bilimlendiriwi bólimine qaraslı mekteplerdiń kitapxanashıları arasında “Zákawat” intellektuallıq oyını ótkerildi.

Ilajda orayımız qánigesi T.Bólekbaeva shıǵıp sóylep, ruwxıy-aǵartıwshılıq ilajlarda kitapxanashılardıń miynetleri joqarı ekenligin atap ótip, kitapxanashılardı kitapqumarlıq hápteliginde belsene qatnasıwǵa, onı keńnen úgit-násiyatlawǵa shaqırdı.
“Zákawat” intelektuallıq oyınına “Tumaris”, “Everest”, “Edige”, “Terbenbes”, “Alpamıs” komandaları qatnasıp, jámi 20 sorawǵa tez hám anıq juwap beriwge háreket etildi.
Jarıs jeńimpazları anıqlanıp, “Everest” komandası birinshi, “Tumaris” komandası ekinshi, “Terbenbes” komandası úshinshi orındı iyeledi.
Jeńimpazlar hám belsene qatnasqan komandalar Málimleme-kitapxana orayınıń húrmet jarlıqları menen sıylıqlandı.
Ilaj sheńberinde mektep kitapxanashılarınıń kitapxanaǵa sayaxatı da shólkemlestirilip, kitapxananıń saytı, natlib.uz saytı, kitapxanada alıp barılıp atırǵan jumıslar, kitapqumarlar ushın jaratılǵan sharayatlar menen jaqınnan tanıstırıp ótildi. “Kitaplardı ulıǵlaǵan ullıdur” atamasında kitaplar kórgizbesi de shólkemlestirildi.
Hápteliktiń tórtinshi kúninde mektepke shekemgi hám mektep bilimlendiriwi bólimine qaraslı 15-21-sanlı mektep oqıwshıları arasında «KVEST» oyını da shólkemlestirildi.
Oyın shártleri boyınsha qatnasıwshılar tapqırlıǵı, ziyrekligi, jańıltpash aytıw hám jumbaqlar shártleri boyınsha óz bilimlerin sınaqtan ótkerdi.
Tańlaw juwmaǵı boyınsha 1-orındı “Shaqqanlar”, 2-orındı “Jiydeli”, “Ziyrekler”, “Liderler”, 3-orındı “Bilimliler” komandaları iyeledi. Jeńimpazlar oraydıń húrmet jarlıqları menen sıylıqlandı.
Kitapqumarlıq hápteliginiń ilajları búgin de dawam etip, Nókis rayonı Insan xızmetleri orayınıń sociallıq qorǵawǵa mútáj turaqlı aǵzaları bolǵan kitapqumarlar menen “Mehirden baslanar júreklerge jol” atamasında ushırasıw keshesi bolıp ótti.
Kesheni Málimleme-kitapxana orayınıń direktorı L.Nurımbetova ashıp berip, jıynalǵanlarǵa dúnyanıń eń belgili insanları kitapqumar bolǵanlıǵın, elimizde mehirge mútáj insanlarǵa mámleketimiz tárepinen jaratılıp berilip atırǵan sharayatlardan nátiyjeli paydalanıwdı, hesh bir puqara mehir jetip barıwdan shette qalmasın degen súren astında kitapxana qánigeleri tárepinen turaqlı túrde sociallıq támiynatqa mútáj insanlarǵa xızmet kórsetilip kiyatırǵanlıǵın atap ótti.
Ilaj dawamında sociallıq qorǵawǵa mútáj kitapqumarlar da ózleri qızıǵıp oqıp atırǵan kitapları, kitapqa qanday mehir qoyǵanlıǵı haqqında jaslarǵa aytıp berdi.
Ilajda qatnasıwshılarǵa oraydıń húrmet jarlıqları hám estelik sawǵaları tapsırıldı. Keshe 14-sanlı mekteptiń “Mádeniyat juldızları” dógerek aǵzalarınıń koncert baǵdarlaması menen dawam etti.
Elimiz boylap ótkerilip atırǵan bul ilajlar kitapqumarlardıń qatarın kóbeytip atırǵanın atap ótsek boladı.
Gúljahan Seydullaeva,
Nókis rayonlıq málimleme-kitapxana orayı kitap fondın toltırıw, saqlaw hám olardı qayta islew xızmeti baslıǵı.

Qaraqalpaqstan xabar agentligi