Usı jıldıń 25-30-aprel kúnleri aralıǵında Qaraqalpaqstan Respublikası pedagogikalıq sheberlik orayı tárepinen «XXI ásir mektep direktorı: strategiyalıq jetekshilik hám innovaciyalıq qatnas» atamasında seminar-treningler shólkemlestiriliwi belgilengen bolıp, búgin usı ilajlardıń dáslepki kúngi jumısları baslandı.

Onda Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva, Pedagogikalıq sheberlik orayınıń direktorı V.Bekmuratovalar shıǵıp sóylep, direktorlardıń kásiplik rawajlanıw processlerin durıs shólkemlestiriw, monitoring etiw, xalıqaralıq sertifikatlarǵa tayarlanıw múmkinshiliklerin jaratıw hám ustazlarda jańa ásir kompetenciyaların rawajlandırıw boyınsha potencialın arttırıw búgingi kúnniń talabı ekenligin atap ѳtti.
Ótkerilip atırǵan bul seminar-treningler de usı maqsetlerge xızmet etedi.
Trening 4 modul tiykarında alıp barılıwı belgilengen.
Birinshi modulde normativlik-huqıqıy tiykarlar hám shólkemlestiriw bóliminde direktorlar “Kásiplik rawajlanıw kúni” hám “Kásiplik rawajlanıw saatı”nıń yuridikalıq tiykarları, kásiplik rawajlanıw koordinatorınıń wazıypaları hám monitoring formaları menen tanısadı.
Ekinshi modul: XXI ásir ustazları hám liderleri dep atalıp, onda zamanagóy liderlik kompetenciyaları, ózgerislerge beyimlesiw, topardıń ishki motivaciyasın arttırıw boyınsha strategiyalar talqılanadı.
«Ustazlar qanlayınsha kásiplik rawajlanadı?» temasına baǵıshlanǵan úshinshi modulde ustazlardıń kásiplik rawajlanıw jolları, monitoring etiw usılları hám ámeliyattı mektepte qollanıwǵa tiyisli usıllar kórip shıǵıladı.
Tórtinshi modul – “Global ustaz – global mektep”. Onda xalıqaralıq sertifikatlar (Google Educator, Microsoft Certified Educator, Cambridge TKT hám t.b.) haqqında maǵlıwmatlar berilip, olardı mektep ámeliyatına engiziw jolları kórsetiledi.
Bul seminar-treningke Qaraqalpaqstan Respublikası boyınsha jámi 727 mektep direktorı qamtıp alınǵan. Olardıń kásiplik rawajlanıwına, sonday-aq, mekteplerde innovaciyalıq ortalıqtıń jaratılıwına úles qosıwı belgilengen.
Bul seminar-trening tálim basqarıwshılarınıń strategiyalıq pikirlewi, liderlik kompetenciyaları hám global tálim trendlerine beyimlesiwine xızmet etedi. Direktorlar ushın bul – tek bilim emes, al ámeliy kónlikpe hám keleshekte bekkem tiykar da bola alatuǵın tájiriybe mektebi bolıp tabıladı.
Seminar-trening jumısları dawam etpekte.

Á.Jiyemuratov,
Qaraqalpaqstan xabar agentligi