Ózbekstan “Adolat” SDP “Korrupciyaǵa qarsı gúresiw aylıǵı” sheńberindegi tórtinshi hápte ilajları mámleketimiz boylap orınlardaǵı shańaraqlıq poliklinikalar hám emlewxanalarda “Densawlıqtı saqlaw tarawın korrupciyadan jıraq tarawǵa aylandıramız!” degen bas ideya tiykarında dawam etpekte.

Ózbekstan “Adolat” SDP Siyasiy Keńesiniń baslıǵı Robaxon Mahmudovanıń Qan quyıw orayında shıpaker hám miyirbiykeler menen birgelikte dógerek sáwbeti ótkerildi.
Ilaj dawamında partiya jetekshisi medicina sistemasında ashıq-aydın hám ádil ortalıqtı qáliplestiriw, xalıqqa sapalı xızmet kórsetiwdi támiyinlew, tarawda korrupciyanıń qáwipin azaytıw boyınsha óz pikirlerin bildirip ótti.
R.Mahmudova bul oray partiyanıń “Bar mehirimiz saǵan, balajan!” donorlıq akciyasın jergilikli aymaqta joqarı dárejede ótkeriwde turaqlı hám isenimli birge islesiwshi ayrıqsha orın ekenin atap ótti.
Kúnniń ekinshi yarımında R.Mahmudova Nókis qalasındaǵı iri sanaat kárxanalarınıń biri – “Nukuselektroapparat” juwapkershiligi sheklengen jámiyetinde bolıp, óndiris processleri menen tanıstı.
Bul kárxana mámleketimizde qayta tikleniwshi energiya dereklerin rawajlandırıw hám quyash panellerin islep shıǵarıwǵa qánigelesken bolıp, elimizde alternativ energiya tarawın keńeytiwge óz úlesin qosıp kelmekte.
Partiya jetekshisi úyreniw jumısları sheńberinde kárxanada miynet etip atırǵan xızmetkerler, atap aytqanda, hayal-qızlar ushın jaratılǵan sharayatlar menen tanıstı.

Qaraqalpaqstan xabar agentligi