Qaraqalpaqstan Respublikası Ministrler Keńesi, tiyisli ministrlikler menen uyımlar tárepinen shólkemlestirilgen, baslı maqseti student-jaslardıń dúnyaǵa ruwxıy-ideologiyalıq kózqarasın qáliplestiriw, bilimlendiriw mákemelerinde ruwxıy-aǵartıwshılıq jumıslardıń nátiyjeliligin arttırıw, olardıń bos waqıtların mazmunlı ótkeriwin shólkemlestiriw hám talantın júzege shıǵarıw bolıp esaplanǵan, «Studentler báhári» festivalı sheńberindegi ilajlar orınlarda dawam etpekte.

Ózbekstan mámleketlik denetárbiyası hám sport universiteti Nókis filialında da festival sheńberinde «Jınayatshılıq hám huqıqbuzarlıqtıń aldın alıw» atamasında ushırasıw bolıp ótti.
Ilajǵa Qaraqalpaqstan Respublikası Ishki isler ministrliginen kelgen qánigeler qatnasıp, jaslarǵa jınayatshılıqtıń awır aqıbetleri haqqında maǵlıwmatlar berip, bahalı másláhátleri, pikir-usınısları menen ortaqlastı.
Jınayattıń túrleri, júz berip atırǵan jınayatlar, oǵan nızam sheńberinde qollanıp atırǵan jaza sharaları, onıń aldın alıw baǵdarında huqıq qorǵaw uyımları tárepinen islenip atırǵan ilajlar haqqında aytıp berip, huqıqbuzarlıqlardan awlaq bolıwǵa shaqırdı.
Mámleket qáwipsizligi hám huqıqbuzarlıqlardıń aldın alıwǵa qaratılǵan bul ruwxıy-aǵartıwshılıq ilajda máhállelerde qáwipsiz ortalıqtı jaratıw, jaslar arasında huqıqbuzarlıqlar hám jınayatshılıqtıń erte aldın alıw boyınsha islenip atırǵan ilajlar tuwralı keń túrde maǵlıwmatlar berildi.
Mámleketimizdegi huqıqıy mádeniyattı arttırıw hám jaslar arasında jınayatshılıqtıń aldın alıw boyınsha ámelge asırılıp atırǵan jańasha ilajlarǵa keńnen toqtap ótilip, pikir-usınıslar bildirildi.
Studentler bul baǵdarda ózlerin qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi