Elimizde ámelge asırılıp atırǵan keń kólemli reformalar procesinde awıl xojalıǵı tarawı jetekshi strategiyalıq tarmaqlardan biri sıpatında belgilengen. Onıń zamanagóy, innovaciyalıq hám básekige shıdamlı túrlerde rawajlanıwı Ózbekstan ekonomikasın rawajlandırıwdıń áhmiyetli faktorlarınan biri bolıp esaplanadı.

Ózbekstan Respublikası Awıl xojalıǵı ministri Ibrohim Abdurahmonovtıń qatnasıwında Beruniy rayonındaǵı «Niyatulla Azizbek» fermer xojalıǵı dala sherteginde shólkemlestirilgen ámeliy seminar usı reformalardıń ámeliy kórinisi bolıp xızmet etpekte.
Ilajǵa taraw basshıları, ministrlik sistemasındaǵı shólkemlerdiń juwapkerleri, sonday-aq, fermerler hám diyqan xojalıqlarınıń wákilleri qatnastı.
Seminar aldında ministrlik sistemasına kiretuǵın shólkemlerdiń wákilleri menen awıl xojalıǵınıń búgingi jaǵdayı, bar resurslardan nátiyjeli paydalanıw, eksportqa qolaylı hám básekige shıdamlı óndiris sistemasın qáliplestiriw sıyaqlı áhmiyetli máseleler dodalandı.
Ilaj dawamında hár bir aymaqtaǵı agrar mashqalalardı tikkeley ornına shıǵıp úyreniw, olar boyınsha anıq sheshimler islep shıǵıw hám ámeliy nátiyjelerge erisiw boyınsha tiyisli wazıypalar belgilendi. Aymaqlarda ámelge asırılıp atırǵan reformalardıń nátiyjeliligi tereń tallanıp, bar mashqalalar hám olardıń sheshimlerine baylanıslı wazıypalar kórsetip ótildi.
Ministr óziniń shıǵıp sóylegen sózinde awıl xojalıǵı búgingi kúnde strategiyalıq áhmiyetke iye taraw sıpatında jańasha qatnastı talap etip atırǵanın atap ótti. Sonlıqtan, hár bir rayon hám sektor jumısı ilimiy tiykarlanǵan, texnologiyalıq hám innovaciyalıq qatnasıqlarǵa súyengen halda shólkemlestiriliwi zárúrligin atap ótti.
Sóylesiwde vertikal basqarıw sisteması, aymaqlıq bólimlerdiń birden-bir basqarıw shınjırına tiykarlanıwı, juwapkershilik hám nátiyjelilik principlerine ámel etken halda jumıs islewi zárúr ekenligi atap ótildi.
Ministr, fermerler hám agroklaster basshıları menen sóylesiwde taraw xızmetkerleriniń zamanagóy bilimlerdi iyelep, bazar talaplarına hám globallıq básekige tayar bolıwı zárúr ekenligin ayrıqsha atap ótti. Sonday-aq, suw resursların aqılǵa uǵras basqarıw, intensiv texnologiyalardı engiziw hám jap-salmalardı tártipke keltiriw boyınsha anıq tapsırmalar belgilendi.
Májiliste azıq-awqat qáwipsizligin támiyinlew, rezervlerdi esapqa alıw hám olardı nátiyjeli basqarıw máseleleri de dodalandı. Sonıń ishinde, «Qoymaxana kitabı» sisteması – azıq-awqat ónimleriniń kiris-shıǵısın turaqlı túrde dizimge alıw arqalı rezervlerdi qadaǵalaw mexanizmin engiziw zárúr ekenligi atap ótildi.
Bunnan tısqarı, ministr paxtashılıq boyınsha Paxtashılıq keńesi ilimpazları tárepinen islep shıǵılǵan metodikalıq qollanbalarǵa qatań ámel etiw, atızlarda sırt el sortları ushın ot-jem maydanların, jergilikli sortlar ushın bolsa, arnawlı qorǵaw zonaların shólkemlestiriw, sonday-aq, tamshılatıp suwǵarıw texnologiyaların basqıshpa-basqısh hám sistemalı engiziw boyınsha tiyisli kórsetpeler berdi.
Maǵlıwmat ushın, Paxtashılıq keńesiniń ilimpazları bir hápte dawamında Beruniy hám basqa da rayonlarda bolıp, diyqanlardıń paxta jetistiriw tájiriybesin úyrenedi, agrotexnikalıq qatnaslardı tallaydı hám fermer xojalıqlarına ilimiy-ámeliy járdem kórsetedi. Bul arqalı ilimiy kózqaraslardı óndiriske engiziw hám atız jumıslarınıń nátiyjeliligin arttırıw názerde tutılǵan.

Qaraqalpaqstan xabar agentligi