Nókis qalasındaǵı 1-sanlı sport mektebinde 2008-2009-jılları tuwılǵan jas óspirimler hám qızlar arasında gúres boyınsha Ózbekstan kubogi jarısı bolıp ótti.

Tórt kún dawam etken jarıstıń sońǵı kúni qatnasıwshılar ulıwma komandalıq bellesiwlerde óz-ara kúsh sınastı.
Keskin bellesiwlerge tolı bolǵan jarıs sońında, barlıq qarsılasların jeńip shıǵıwǵa miyasar bolǵan Surxandárya wálayatı komandası birinshi orındı iyelep, bas sıylıq iyesine aylandı.
Finalǵa shekem jeńilissiz jetip kelgen Sırdárya wálayatı komandası ekinshi, Buxara wálayatı hám respublikamız jas palwanları sıylı úshinshi orınlardı iyelewge miyasar boldı.
-Jarıs dawamında jekpe-jek bellesiwlerde respublikamızdıń úmitli palwanlarınan +90 kg da Ersultan Tolıbaev hám +70 kg da Nafisa Asamatdinovalar altın, 55 kg da Bawbek Adaybaev gúmis, 70 kg salmaqta Sevinich Yuldasheva, 44 kg da Ulbosın Dawletmuratova qola medalların qolǵa kirgiziwge miyasar boldı,-deydi respublikamız saylandı komandasınıń aǵa treneri Jamshid Turabaev.-Jaslarımızdıń erisken bul jetiskenlikleri biz trenerlerdi de alǵa qaray umtıldıradı.
Ótkerilgen jarıs sońında jeńimpazlar hám sıylı orın iyeleri shólkemlestiriwshiler tárepinen arnawlı diplom, medal hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.