Ózbekstan Respublikası Awıl xojalıǵı ministri Ibrohim Abdurahmonov hám Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev respublikamızda jaylasqan fermer xojalıqlarında alıp barılıp atırǵan agrotexnikalıq jumıslardıń barısı menen tanıstı.
Olar Ámiwdárya rayonındaǵı «Diyorbek Kanjigali» fermer xojalıǵında sırt el ǵawasha sortların egiwde qollanılatuǵın Qıtay texnologiyası, tamshılatıp suwǵarıw hám jergilikli sortlardan qorǵaw zonaların shólkemlestiriw usılların kórip shıqtı.
-Úyreniwler dawamında Awıl xojalıǵı ministri Ibrohim Abdurahmonov agrotexnikalıq ilajlardıń júrgiziliwin unamlı bahalap, olardı jáne de nátiyjeli shólkemlestiriw boyınsha usınıslar berdi,-deydi Qaraqalpaqstan Respublikası Awıl xojalıǵı ministriniń birinshi orınbasarı Akbar Koziev.-Sonday-aq, juwapkerlerge máwsim dawamında atız jumısların sapalı shólkemlestiriw, azıqlandırıwda belgilengen norma hám tártiplerge ámel etiw jáne agrotexnikalıq ilajlarda ilimiy tiykarlanǵan qatnaslardı engiziw boyınsha kórsetpeler berdi.
Úyreniwler dawam etpekte.
Adilbay Orazov,
Qaraqalpaqstan xabar agentligi sholıwshısı.