Respublikamızdıń barlıq aymaqlarında “Ózbekstan kitapqumarlar eli” súreni astında V Respublikalıq “Kitapqumarlıq hápteligi” ótkeriliwi belgilengen edi.
Beruniy rayonındaǵı Málimleme-kitapxana orayında háptelik dawamında túrli ilajlar, dógerek sáwbetleri, shayırlar menen ushırasıwlar ótkeriliwi rejelestirilgen, – delinedi Beruniy rayonı hákimligi Málimleme xızmeti bólimi bergen maǵlıwmatında.
Ilajlar sheńberinde shayır Muhammad Yusuftıń tuwılǵan kúnine baǵıshlanǵan eslew keshesi shólkemlestirildi. Kitapqumarlar shayırdıń ómiri hám dóretiwshiligi haqqında maǵlıwmatlar berip ótti.
Sonday-aq, kórkem ádebiyat oqıwǵa qızıǵıwshı jaslar menen óz-ara sáwbetlesiwler ótkerildi.
Ilaj dawamında “Men súyip oqıǵan shıǵarma” temasında pikirlesiwlar bolıp ótti. Kitapqumarlar ózleri súyip oqıǵan shıǵarmasınıń qaharmanlarınıń obrazların ashıp beriwge háreket etti.
– Beruniy rayonı Málimleme-kitapxana orayı 57 mıń kitap fondına iye bolıp, sonnan 40 mıńı kórkem ádebiyatlar bolıp esaplanadı. 12 846 kitapqumar aǵza bolıp kitap fondınan turaqlı paydalanıp keledi. Orayda 12 dógerek shólkemlestirilgen. Sonday-aq, 6 orında kóshpeli kitapxanalar bar. Kitapxanada kózi ázzi oqıwshı kitapqumarlar ushın Brayl álipbesindegi kitaplar toplamı orın alǵan. Olardıń talap hám tileklerine qaray kitap fondı qosımsha ádebiyatlar menen jańalanıp barıladı. Kitapqumarlıq hápteligi dawamında ruwxıy dúnyasın bayıtıw tilegindegi barlıq kitapqumarlardı belsendilikke shaqırıp qalamız, – deydi rayon hákimligi Málimleme xızmeti bólimi baslıǵı A.Urazova.
Qaraqalpaqstan xabar agentligi