Ózbekstan Respublikası Prezidenti Shavkat Mirziyoevtıń usı jıldıń 14- fevral kúni jaslar menen bolǵan ushırasıwında erteńgi keleshegimiz iyeleriniń ruwxıy tárbiyası hám ideologiyalıq immunitetin kúsheytiw, olardı jat ideyalardan qorǵaw biziń hár birimizdiń wazıypamızǵa aylanıw shártligi tuwralı jáne bir márte atap ótken edi.

Jas áwladta milliy mánawiyattı qáliplestiriw, qádiriyatlarımızǵa húrmet tuyǵısın bunnan bılayda kúsheytiw, jaslardıń ármanların júzege shıǵarıw maqsetinde, respublikamızda jaylasqan joqarı oqıw orınlarında «Ózbekstan –birden-bir Watan» súreni astında «Studentler báhári festivalı» atamasında ruwxıy-aǵartıwshılıq bayram ilajları bolıp ótpekte.
Festival sheńberinde, «Quwnaqlar hám ziyrekler», «Jaslar teatr studiyaları, «Zákawat», «Debat» intellektuallıq oyınları, jas kitapqumarlar arasında «Mutollaa» joybarın ámelge asırıw, talantlı studentler hám jas ilimpazlar ushın «Ilimiy konferenciyalar» hám sport jarısların shólkemlestiriw belgilengen.
«Studentler báhári» festivalı sheńberinde Nókis mámleketlik texnika universiteti student-jasları arasında «Zákawat» intellektuallıq turniri, sporttıń voleybol hám mini futbol túrinen jarıs, «Juldızlı kino» mádeniy ilajı, Jaslar arasında huqıqbuzarlıq hám jınayatshılıqtıń aldın alıwǵa baǵıshlanǵan ushırasıw kesheleri ótkerildi.
Atap aytqanda, «Juldızlı kino» joybarı sheńberinde jańa kórkem filmniń premerası studentler názerine usınıldı.
Bul joybardı ótkeriwden tiykarǵı maqset – studentler arasında kino kórkem ónerine bolǵan qızıǵıwshılıqtı arttırıw, jas dóretiwshilerdi qollap-quwatlaw hám mádeniy-aǵartıwshılıq ortalıqtı jáne de bayıtıwdan ibarat. Bunday baslamalar arqalı studentler dóretiwshilik pikirlew hám kórkem ónerge mehir qoyıw baǵdarında jáne de ilhamlanbaqta.
Sonıń menen birge, festivalı sheńberinde Nókis mámleketlik texnika universitetinde «Zákawat» intellektuallıq turniri shólkemlestirildi.
Jarısta komandalar 20 logikalıq hám ilimiy sorawlarǵa juwap beriw menen birge ózleriniń ziyrekligin kórsetti.
-Festival sheńberinde bunday tańlawlardı shólkemlestiriwden maqset olardıń potencialın arttırıw, kózqarasın keńeytiw hám bos waqıtların mazmunlı shólkemlestiriw bolıp esaplanadı,-deydi Nókis mámleketlik texnika universitetindegi «Zákawat» klubı koordinatorı Nizamatdin Qıdırniyazov.
«Studentler báhári» festivalı respublikamız boylap kóterińki ruwxta shólkemleskenlik penen dawam etpekte.

Adilbay Orazov,
Qaraqalpaqstan xabar agentligi sholıwshısı.