Házirgi kúnleri Nókis qalasındaǵı 1-sanlı sport mektebinde 2008-2009-jılları tuwılǵan jas óspirimler hám qızlar arasında gúres boyınsha Ózbekstan kubogi jarısı bolıp ótpekte.

Keshe ul balalar 83, 90, +90 kg salmaq kategoriyaları, qızlar 63, 70 hám +70 kg salmaq kategoriyaları boyınsha óz-ara bellesti.
Qızǵın ótken bellesiwler juwmaǵında, 83 kg salmaqta qashqadáryalı Sardar Saparov, 90 kg da xorezmli Mahmud Azimbaev hám eń awır salmaq +90 kg da qaraqalpaqstanlı Ersultan Tolıbaevlar altın medaldı qolǵa kirgiziwge miyasar boldı.
Al, qızlar arasında ótkerilgen bellesiwler juwmaǵında, 63 kg da buxaralı Shaxzoda Isakbaeva, 70 kg da Nawayı wálayatınan Shaxrizada Egamberdieva hám +70 kg da respublikamız wákili Nafisa Asamatdinovalar Ózbekstan kuboginiń jeńimpazına aylandı.
Sonday-aq, 70 kg salmaqta jarısqa qatnasqan respublikamız palwanı Sevinich Yuldasheva qola medalın jeńip alıwǵa miyasar boldı.
Jarıs jeńimpazları hám sıylı orın iyeleri shólkemlestiriwshiler tárepinen arnawlı diplom, medal hám estelik sawǵalar menen sıylıqlandı.
Búgin usı jarıs sheńberinde, komandalıq bellesiwler ótkeriledi.

Adilbay Orazov,
Qaraqalpaqstan xabar agentligi sholıwshısı.