Berdaq atındaǵı Qaraqalpaq mámleketlik universitetinde Ózbekstan Respublikası Prezidentiniń “2025-jılda respublika máhállelerinde qáwipsiz ortalıqtı jaratıw hám huqıqbuzarlıqlardıń aldın alıw sistemasınıń nátiyjeliligin arttırıw boyınsha ilajlar haqqındaǵı”ǵı qararınıń mazmun-mánisi boyınsha túsinik jumısları alıp barıldı, – dep maǵlıwmat beredi QMU Baspasóz xızmeti.

Ótkerilgen ilajda Qaraqalpaqstan Respublikası Ádillik ministriniń orınbasarı A.Prenov, Nókis qalalıq sudınıń tergew sudyası R.Nazarov, fakultet tyutorları hám student-jaslar qatnastı.
Májilis aldınan universitettiń Jaslar máselesi hám ruwxıy-aǵartıwshılıq isleri boyınsha prorektorı S.Alawatdinov shıǵıp sóylep, usı másele boyınsha alıp barılıp atırǵan jumıslar haqqında aytıp ótti.
Shıǵıp sóylegenler jaslar arasında jınayatshılıqtı azaytıw ushın ámelge asırılıp atırǵan profilaktikalıq ilajlar, tálim-tárbiya jumısları hám huqıqıy úgit-násiyatlawlardıń áhmiyetine toqtap ótip, studentlerdiń ruwxıy-ádep-ikramlılıq tárbiyasın bekkemlew, sonıń menen birge, jınayatlardıń aldın alıwda jaslardıń belsendiligin arttırıw zárúrligin atap ótti.
Soń, kóshpeli sud májilisi óz jumısın basladı. Sudya tárepinen ashıq kóshpeli sud májilisi qatnasıwshılarına jınayattıń huqıqıy aqıbetleri haqqında túsinik berildi.

Qaraqalpaqstan xabar agentligi