VVS basılımınıń xabar beriwinshe, Hindstanda 2023-jılı 480 mıńnan aslam jol-transport hádiyseleri (JTH) júz bergen. Olardıń nátiyjesinde 172 mıńnan aslam adam qaytıs bolǵan.

Hádiyseler dárejesi:
• Hár úshinshi JTH qurbanlarǵa sebep bolmaqta.
• JTHlarda kúnine 474 adam, hár minutta bolsa 3 adam qaytıs bolmaqta.
• 35 mıń piyada qaytıs bolǵan.
• Kóplegen velosiped hám motocikl mingenler qaytıs bolǵan.
• 10 mıń bala baxıtsız hádiyselerdiń aqıbetinde qaytıs bolǵan.
Hindstanda JTHlar ne sebep júz bergen?
– Transport ministriniń atap ótiwinshe, JTHlardıń sebebi kóp, biraq tiykarǵısı insan faktorı.
• JTHlardıń kópshiligi transport basqarıwshılarınıń tez hám qáwipli aydawı sebebinen bolgan.
• Qalaberdi, avtomobillerdiń gónergen jaǵdayı hám texnikalıq jaqtan qáwipsizlik talaplarına juwap bermeytuǵını da áhmiyetli faktorlardan biri.
Apatshılıqlardıń kópligi ne menen baylanıslı?
• 54 mıń velosiped hám motocikl mingenler shlem kiymegen.
• 16 mıń aydawshı hám jolawshı qáwipsizlik remenin taqpaǵan.
• 34 mıń qaytıs bolǵan aydawshınıń aydawshılıq gúwalıǵı bolmaǵan.
JTHlardıń júz beriwine jol infrastrukturasındaǵı kemshilikler de ayrıqsha faktor sıpatında tásir etpekte. Olardıń kópshiligin sapasız hám talaplarga juwap bermeytuǵın jol qaplamaları, jol belgileri hám sızıqlardıń jeterli emesligi yamasa nadurıs ornatılǵanlıǵı, bordyur, tosıq hám basqa da qáwipsizlik qurallarınıń jetispewshiligi yamasa ornatılıwındaǵı kemshilikler quraydı.
JTH aqıbetlerin saplastırıw qárejetleri Hindstan JIÓniń 3 procentine teń.
JTHlardıń aldın alıw maqsetinde tómendegi sharalar kóriliwi belgilengen: 1. jollardıń injenerlik jaqtan jaqsılanıwı; 2. texnikalıq qadaǵalaw hám standartlar; 3. xalıqtı xabardar etiw, profilaktika. 4. nızamlardı qatań orınlaw; 5. tez medicinalıq járdem sistemasın jetilistiriw.
Juwmaq:
Ózbekstanda da JTHlar awır mashqalalardıń qatarınan orın alǵan. Olar tiykarınan tezlikti asırıw, qáwipli aydaw, qaǵıydalarǵa ámel etpew sebepli júz beredi. Jol belgileri hám qáwipsizlik quralların ornatıwdaǵı kemshilikler de bul processke biraz tásir kórsetpekte.
Biraq, JTHlar sanı jıl sayın azaymaqta: 2021-jılı – 10001, 2022-jılı – 9902, 2023-jılı – 9839, 2024-jılı – 9364 JTH dizimge alınǵan. Avtotransport qurallarınıń sanı artıp baratırǵanın esapqa alsaq, mámleketimizde jol háreketi qáwipsizligin támiyinlew boyınsha durıs qatnas tańlanǵan, dep ayta alamız. Aydawshılıq kurslarınıń sapası ústinen qadaǵalawdı kúsheytiw; tezlik sheklewleriniń engiziliwi, kameralar hám qadaǵalaw qurallarınıń ornatılıwı belgili dárejede unamlı tásir etpekte.

Qaraqalpaqstan xabar agentligi.