Keyingi jılları elimizde jaslardıń huqıqları menen máplerin qorǵawǵa mámleketlik siyasattıń tiykarǵı baǵdarlarınan biri sıpatında itibar qaratılıp, olardı reformalar procesine jedel tartıw, jaslardıń ideyaları menen baslamaların júzege shıǵarıw ushın keń imkaniyatlar jaratılmaqta.

Jaslardıń siyasiy belsendiligin arttırıw hám olardı nızam dóretiwshiligi procesine keńnen tartıw maqsetinde Nızamshılıq palatası janında shólkemlestirilgen Jaslar parlamenti búgingi kúnde jaslardıń máplerin qorǵaw, olardı nızamshılıq processlerine tartıw hám olar menen mámleket arasında kópir wazıypasın atqarıp kelmekte.

Házirgi waqıtta Respublikanıń barlıq aymaqlarında ÓzLiDeP Siyasiy Keńesi Atqarıw komitetiniń 2025-jıl 6-marttaǵı májilisi qararı menen tastıyıqlanǵan reje tiykarında, Ózbekstan Respublikası Oliy Majlisi Nızamshılıq palatası janındaǵı Jaslar parlamenti aǵzaların saylaw procesi baslanǵan.
ÓzLiDeP Qaraqalpaqstan Respublikası Keńesiniń májilisler zalında saylawdıń Qaraqalpaqstan Respublikası basqıshı bolıp ótti. Onda partiyanıń Qaraqalpaqstan Respublikası Keńesiniń baslıǵı S.Turmanov shıǵıp sóylep, mámleketimizde jaslar baǵdarında alıp barılıp atırǵan reformalar hám partiyanıń “Jaslar qanatı” tárepinen alıp barılıp atırǵan ámeliy ilajlar boyınsha jaslarǵa keń túrde maǵlıwmatlar berip ótti.

Jaslar parlamentine saylaw – jaslardı Ózbekstan Respublikası Konstituciyası hám nızamlarına húrmet ruwxında tárbiyalaw, jigit-qızlarda báseki mádeniyatın qáliplestiriw, elektorat máplerin qorǵaw sonday-aq, hár bir partiyanıń jaslarǵa baylanıslı usınıs hám baslamaların alǵa qoyıw, wákillikli uyımlarǵa talabanlar rezervin qáliplestiriw, múnásip jaslardı Jaslar parlamentine saylaw maqsetinde ótkeriledi, – dep atap ótti ÓzLiDeP Qaraqalpaqstan Respublikası keńesiniń baslıǵı S.Turmanov.
Bul saylawda qatnasıp atırǵan 316 talaban 18 jastan 30 jasqa shekemgi joqarı (tamamlanbaǵan joqarı) maǵlıwmatqa iye, Ózbekstan Respublikası puqarası, siyasiy partiyamızdıń aǵzası, belsendi jaslar bolıp esaplanadı. Sonday-aq, saylawǵa Ózbekstan Respublikası Oliy Majlisi Nızamshılıq palatası deputatlarınıń járdemshileri hám partiya sistemasında jumıs alıp barıp atırǵan xızmetkerler, sonday-aq, Jaslar parlamentine aldınǵı saylawda saylanǵanlar da talaban sıpatında hújjet tapsırdı. Eń tiykarǵısı, bul saylawda gender teńlikke itibar qaratılǵan bolıp, talabanlardıń ulıwma sanınıń keminde 30 procentin hayal-qızlar quraydı.

– Saylawdı shólkemlestiriw hám ótkeriw tártibi, shártleri, rejesi, maqset hám wazıypaları, onı úgit-násiyatlaw boyınsha anıq kórsetpeler tiykarında shólkemlestirildi,-deydi ÓzLiDeP Qaraqalpaqstan Respublikası Keńesiniń bólim baslıǵı Klara Xudaybergenova.-Oǵan muwapıq Jaslar parlamentine saylaw procesinde jaslardıń tolıq hám nátiyjeli qatnasıwın támiyinlewde aymaqlıq saylawaldı shtabı shólkemlestirildi, saylawdı ashıq-aydın hám qalıs ótkeriw maqsetinde partiyanıń aymaqlıq hám rayonlıq (qalalıq) Keńeslerinde Shólkemlestiriw komiteti hám Tóreshiler quramı tayınlandı hám jumısın jolǵa qoyıw ushın barlıq sharayatlar jaratıp berildi.
Saylaw procesi eki basqıshta shólkemlestirildi. Ekinshi Qaraqalpaqstan Respublikası tańlap alıw basqıshında 57 jas qatnastı.

Tańlaw basqıshında talabanlardıń mámleketlik tildegi sawatlılıq dárejesi, siyasiy partiyanıń jumısına qatnası, nızamshılıq tarawındaǵı bilim hám kónlikpesi, nızamshılıqtı jetilistiriw boyınsha tiykarlanǵan usınısları, mámleketlik basqarıwǵa baylanıslı bilimi, siyasiy hám huqıqıy sawatlılıǵı, mámleketimizde ámelge asırılıp atırǵan reformalarǵa múnásibeti sonday-aq, jetekshilik qábileti sıyaqlılarǵa ayrıqsha itibar qaratıldı.
Usınılǵan barlıq hújjetler, tóreshiler quramı hám shólkemlestiriw komitetleri tárepinen ashıq-aydınlıq hám ádillik principleri tiykarında úyrenilip, eń múnásip hám belsendi 9 talaban Ózbekstan Respublikası basqıshında qatnasıw imkaniyatına iye boldı.

Qaraqalpaqstan xabar agentligi