Mámleketimizde jaslardı kitapqumarlıqqa tartıw, olardıń bos waqıtların mazmunlı ótkeriw ushın bántligin támiyinlewge ayrıqsha itibar qaratılıp, bir qatar ilajlar alıp barılmaqta. Ásirese jaslardıń kitap oqıwǵa bolǵan qızıǵıwshılıǵın arttırıw hám kitapqumarlıq mádeniyatın ele de rawajlanlırıw baǵadarında tarawda bir qatar ilajlar ámelge asırılmaqta.

Nókis rayonı Málimleme-kitapxana orayında 21-27-aprel kúnleri dawamında bolıp ótetuǵın «Ózbekstan-kitapqumarlar jurtı» súreni astındaǵı V Respublika «Kitapqumarlıq hápteligi»niń ashılıw máresimi bolıp ótti.
Ilajǵa Nókis rayonı Nuranıy qorı baslıǵı J.Qaypov, Ádillik bólimi baslıǵı A.Ótewliev, Respublika ruwxıy-aǵartıwshılıq orayı rayonlıq bólimi baslıǵı N.Toimbetov, jazıwshı hám jurnalistler menen kitapqumarlar qatnastı.
Ilajda sózge shıqqanlar, Prezidentimiz tárepinen mámleketimizde kitapqumarlıq mádeniyatın arttırıw hám kitap basıp shıǵarıw boyınsha qarar hám pármanlar qabıl etilip, bul baǵdarda keń kólemli jumıslar alıp barılıp atırǵanlıǵın atap ótip, oqıwshı -jaslarǵa kitap-bul ruwxıy azıq, kitapqumarlıq bolsa eń aǵla payzıylet ekenligin sóz etip, kitap penen dos bolıwǵa hám onı qádirlewge shaqırdı.
Bunnan soń, ilaj sheńberinde jıl dawamında kitapxana ilajlarında belsene qatnasqan hám eń kóp kitap oqıǵan kitapqumar ata-analar menen birgelikte belsendi jaslarǵa Málimleme-kitapxana orayı tárepinen estelik sawǵaları menen Húrmet jarlıqları tapsırıldı.
Sonday-aq, Málimleme-kitapxana orayı qánigeleri tárepinen kitapxanaǵa jańadan kelgen kórkem ádebiyatlardan M.Nızanovtıń “Tutqın,” “Qaraqalpaqtıń dańqlı perzentleri” hám jáhán ádebiyatınan Yuy Xuanıń “Jasaw” romanlarına bibliografiyalıq sholıwlar berip ótildi.

Qaraqalpaqstan xabar agentligi