Keshe Saudiya Arabstanınıń Toif qalasındaǵı «Korol Faxd» stadionında 17 jasqa shekemgi jas óspirimler arasında futbol boyınsha Aziya kubogi óz juwmaǵına jetti.

Jarıstıń final bellesiwinde Islom Ismoilov basshılıǵındaǵı Ózbekstan saylandı komandası óziniń jeńisli júrislerin dawam etip, oǵada qıyın ótken ushırasıwda 2:0 esabında qaharmanlarsha jeńiske eristi.
Bul futbolshılarımızdı qaharmanlarsha dewimizdiń sebebi, olar derlik bir saat dawamında maydan iyeleri esaplanǵan Saudiya Arabstanı saylandı komandasınan 2 oyınshı az bolıp oynadı hám qarsılasları dárwazasına 2 gol urıwǵa miyasar boldı.
Endi ushırasıwdaǵı qızıqlı waqıyalarǵa toqtalatuǵın bolsaq, oyınnıń 40-minutına shekem mámleketimiz jasları kóbirek topqa iyelik etip, óz qarsılasları dárwazası aldında bir neshe qáwipli hújimler shólkemlestiriwge eristi. Usınday hújimlerdiń birinde komandamız hújimshisi Nurbek Sarsenbaev arablardıń oń qanat qorǵawshısı menen soqlıǵısıp, Nurbektiń ayaǵı ústine qorǵawshı qulap tústi. Buǵan ashıwı kelgen futbolshımız ayaǵın arab futbolshısınıń astınan shıǵarıp alıw payıtında óz qarsılasınıń gegirdegine baltırın tiygizip aldı hám ushırasıw tóreshisi qatarlı Yusuf Aref Al-Shamari tárepinen qızıl kartochka menen jazalandı.
Álbette, Nurbektiń maydannan shetletiliwi komandamızdıń oyınına unamsız tásir kórsetip, futbolshılarımız bir qatar qáteliklerge jol qoydı hám usınday qáwipli hújimlerdiń birinde járiyma maydanına kirip baratırǵan saudiyalı futbolshını qorǵawshımız Miraziz Abdukarimov qolı menen uslap qalıp, qızıl kartochka menen jazalandı.
Birinshi taymnıń ózinde-aq, eki futbolshımızdıń maydannan shetletiliwi komandamızdıń bas trenerinen baslap, barlıq oyınshılar hám elimiz sport jankúyerlerin ashıwǵa buwlıqtırıp, qáweterge saldı.
Biraq, ushırasıwdıń ekinshi taymı kópshilik kútkendey bolmadı hám jas futbolshılarımız ózleriniń bar kúsh-jigerin kórsetip, 50-minutta Saudiya Arabstanı dárwazası aldında penalti islep alıwǵa eristi hám onı 3-nomerli qorǵawshımız Muhammad Hakimov anıq ámelge asırıwǵa miyasar boldı.
Saudiya dárwazasına urılǵan bul gol komandamız oyınshıları júreginde isenim payda etip, jankúyerlerimizlerdi sheksiz quwanıshqa bóledi.
Bunnan soń Saudiya Arabstanı bas treneri oyında bir neshe hújimshilerdi maydanǵa túsirip, oyınǵa keskin burılıs jasamaqshı boldı. Lekin, oyın braziliyalı trenerdiń oylaǵanınday bolmay 70-minutta 7-nomerli Sadriddin Xasanov Saudiya dárwazasına ájayıp tárizde gol urıp, komandamızdı chempionlıqqa jaqınlastırdı.
Bul goldan soń saudiyalı futbolshılar da kóplegen qáwipli hújimler shólkemlestirdi. Biraq, komandamız dárwazamanı hám barlıq futbolshılarımızdıń isenimli oyınları dárwazamızdı gollardan saqlap qaldı hám Islom Ismoilov basshılıǵındaǵı Ózbekstan jas óspirimler saylandı komandası chempionlıqtı qolǵa kirgiziwge miyasar boldı.
Sonday-aq, jarıs sońında saylandı komandamızdıń dárwazamanı Nematulloh Rustamjonov «Eń jaqsı dárwazaman», Asilbek Aliev «Eń jaqsı hújimshi», Sadriddin Xasanov «Eń jaqsı oyınshı» nominaciyası boyınsha jeńimpazlıqtı qolǵa kirgiziwge eristi.
Qaraqalpaqstanlı sport jankúyerleri ushın áhmiyetli tárepi sonda, saylandı komanda quramında Ázizbek Erimbetov, Nurbek Sarsenbaev hám Bahadır Izbasqanovlar da qatnasıp, altın medal menen sıylıqlandı.

Adilbay Orazov,
Qaraqalpaqstan xabar agentligi sholıwshısı.