Beruniy nasos stanciyaları hám energetika basqarmasınıń juwapkerleri tárepinen nasos stanciyalarında energiya resurslarınan paydalanıwdıń nátiyjeliligin arttırıwǵa baylanıslı máselelerge baǵıshlanǵan seminar shólkemlestirildi.

Kórgizbeli seminarda rayondaǵı barlıq nasos stanciyalarınıń basshıları hám jumısshı-xızmetkerleri qatnastı.
Beruniy nasos stanciyaları hám energetika basqarması baslıǵınıń orınbasarı M.Yusupbaev usı jıldıń 17-aprel kúni Suw xojalıǵı ministrliginde videoselektor tárizinde ótkerilgen májiliste nasos stanciyalarında energiya resurslarınan paydalanıw boyınsha belgilengen wazıypalarǵa keń túrde toqtap ótip, ámelge asırılatuǵın áhmiyetli jumıslar belgilep alındı.
Ilajda bıyılǵı jılı suw xojalıǵında “Nasoslardıń nátiyjeliligin arttırıw jılı” dep belgilengeni ayrıqsha atap ótilip, bul baǵdarda ámelge asırılatuǵın jumıslar da dodalandı. Juwapkerler nasos stanciyalarında qanday etip energiyanı únemlew múmkin, degen sorawǵa anıq juwap beretuǵın ilajlardı ámelge asırıw zárúr ekenligi atap ótildi.
Sonıń ishinde, sınaq túrinde bul nasos stanciyasındaǵı quwatlılıǵı 110 kVt, suw shıǵarıwı 0,5 m3/sek. bolǵan nasos agregatınıń ornına 2 dana zamanagóy “SHIMGE” nasos agregatları ornatılǵan.
Bul ilajlardıń energiyanı únemlewdegi áhmiyeti túsindirilip, qatnasıwshılar bul nasos agregatları hám ornatılıp atırǵan quyash panelleri menen tanısıp, qızıqtırǵan sorawlarına juwap aldı.
Usı mazmundaǵı seminarlar basqa rayonlarda da shólkemlestirilmekte.

Qaraqalpaqstan xabar agentligi