ÓzLiDeP tárepinen hár jılı ótkerilip atırǵan “Isbilermen hayal-2025” tańlawınıń rayondaǵı máhálle basqıshı shólkemlestirildi.
Tańlawdıń tiykarǵı maqseti aymaqlarda jergilikli óndiristi jolǵa qoyǵan, kem támiyinlengen shańaraqlarǵa materiallıq, ruwxıy ǵamxorlıq kórsetken, “Hayal-qızlar,” “Jaslar” dápterlerinde dizimde turǵanlardı jumıs penen támiyinlewde órnek bolıp kiyatırǵan intalı hám miynet súygish hayal-qızlarǵa ayrıqsha itibar qaratıp atırǵan isbilermen hayal-qızlardı anıqlawdan ibarat.
Tańlawdıń Kegeyli rayonı “Gujim terek,” “Xalqabad”, “Baxıtlı” hám “Quyashlı” MPJdaǵı “máhálle” basqıshı da joqarı dárejede shólkemlestirildi. Kegeyli rayonı “Quyashlı” MPJ da bolıp ótken tańlawda isbilermen hám ónerment hayal-qızlar óz ónimleri menen qatnastı.
Tóreshiler quramı aǵzaları jeńimpazlıqqa talabanlardıń ámeliy jumısları menen jaqınnan tanısıp, usı kúnge shekem erisken jetiskenlikleri, imkaniyatları, keleshektegi rejeleri hám kemshiliklerin de úyrendi.
Tańlaw juwmaǵı boyınsha «Quyashlı»MJP aymaǵındaǵı jeke isbilermen G.Perdebaeva máhálle basqıshında jeńimpaz bolıp, rayonlıq basqıshqa jollama aldı.
Qaraqalpaqstan xabar agentligi