Press-tur

Qaraqalpaqstan Respublikası Kámbaǵallıqtı qısqartıw hám bántlik ministrligi tárepinen ǵalaba xabar quralları wákilleriniń qatnasıwında Ámiwdárya rayonına Media-tur shólkemlestirildi. Ilaj dawamında jurnalistler rayondaǵı jańadan jumıs baslaǵan isbilermenlerdiń jumısları menen birge, úy aldı qıytaq jerden ónimli paydalanıp, óz shańaraǵına qosımsha dáramat keltirip otırǵan shańaraqlardıń jaǵdayları menen de tanıstı. Media- tur tek ǵana jergilikli isbilermenliktiń búgingi kúndegi rawajlanıw jaǵdayı emes, al onıń keleshegi haqqında da tereń pikir júrgiziwge shaqıratuǵın ilaj boldı.
Biz tanısqan obektlerde jańadan ashılǵan imkaniyatlar, jańa jumıs orınları hám eń áhmiyetlisi, jergilikli xalıqtıń turmısın jaqsılawǵa qaratılǵan dıqqat-itibar Prezidentimizdiń basshılıǵında mámleketimizde alıp barılıp atırǵan reformalar, «Kámbaǵallıqtan-abadanlıqqa qaray» baǵdarlamasınıń rayon kóleminde ámelge asırılıp atırǵanlıǵını menen qunlı. Isbilermenlerdiń jumısın jolǵa qoyıwda mámleket tárepinen kórsetilgen járdem, atap aytqanda, subsidiyalar hám jeńilletilgen kreditler úlken járdem bolǵan. Búgin olar ózleri jaratqan jumıs orınları arqalı basqa da puqaralarǵa jańa úmit, jańa imkaniyatlar baǵıshlamaqta.
-Rayonımızda kámbaǵallıqtı qısqartıw baǵdarında sistemalı jumıslar alıp barılıp, házirgi kúnde 2 933 shańaraq (12 432 xalıq) kámbaǵallıq reestrine kirgizilgen bolıp, usı jıldıń ekinshi shereginde 697 shańaraqtı kámbaǵallıqtan shıǵarıw rejelestirilgen bolıp, ámelde 852 shańaraq (3796 xalıq) tıń kámbaǵallıqtan shıǵarılıwına erisildi. Sonday-aq, “Kámbaǵallıqtan abadanlıqqa qaray” baǵdarlaması sheńberinde 8 914 shańaraq sociallıq qorǵawdıń birden-bir reestrine kirgizilgen. 49 máhálle jetiligi tárepinen 9 298 shańaraq xatlawdan ótkerilip, 4-5 kategoriyadaǵı 909 shańaraqtan 520 shańaraq tańlap alınıp, olar menen individual jumıs alıp barıw maqsetinde Respublika hám rayon kólemindegi juwapker basshılar biriktirildi. Usı 520 shańaraqtıń hár biri ushın óz aldına individual baǵdarlamalar islep shıǵılıp, 1970 ilajdı ámelge asırıw rejelestirildi,-deydi Qaraqalpaqstan Respublikası Kámbaǵallıqtı qısqartıw hám bántlik ministrliginiń Ámiwdárya rayonlıq bóliminiń baslıǵı Mamurjon Temirbaev.
Biz sanaat zonasında jaylasqan, isbilermen Dildora Xaytbaeva basshılıq etip atırǵan sútten tayarlanatuǵın ónimlerdi islep shıǵarıwǵa qánigelesken “Kamron Gold Media” JShJ hám “Ravshanbek-Yulduzxon” jeke menshik kárxanasına qaraslı nan hám konditer ónimlerin islep shıǵarıw cexında boldıq.
Isbilermen Dildora Hayitbaevanıń atap ótiwinshe, 2008-jılı anası menen birgelikte kúnine 100 nan hám pátir jabıwdan baslaǵan kishi isbilermenlik jumısı búgingi kúnge kelip 33 jumıssız puqaranıń bántligin támiyinlegen óndiris kárxanasına aylanǵan. Itibarlısı, kárxanada jumıs islep atırǵanlardıń kópshiligi sociallıq qorǵawǵa mútáj, “Hayal-qızlar dápteri”nde turǵan jergilikli puqaralar bolıp, búgin turaqlı jumıs penen támiyinleniwi nátiyjesinde shańaraqlıq sharayatları barǵan sayın jaqsılanbaqta.
Isbilermenniń jumısı Ózbekstan Respublikası Prezidentiniń “Qaraqalpaqstan Respublikasında isbilermenlik, innovaciyalıq texnologiyalar hám infrastrukturalardı jedel pátlerde rawajlandırıw haqqında”ǵı Pármanı tiykarında 200 mıń AQSh dolları muǵdarındaǵı jeńilletilgen bank krediti esabınan Qıtay Xalıq Respublikasınan zamanagóy stanoklar, ásbap-úskeneler alıp keliniwi nátiyjesinde jáne de rawajlanbaqta.
Búgingi kúnde “Kamron Gold Media” JShJda 10 nan aslam túrdegi sút ónimleri islep shıǵarılmaqta. Kúnine 600 litrden aslam sút qayta islenedi. Islep shıǵarılǵan sút ónimleri rayondaǵı mámleketlik mektepke shekemgi bilimlendiriw shólkemlerine shártnama tiykarında jetkerip beriledi. Kárxananıń 4 jetkerip beriw mashinaları bolıp, islep shıǵarılǵan ónimler sol kúnniń ózinde tutınıwshılarǵa jetkerip beriledi. Mangıt diyqan bazarında da kárxanaǵa qaraslı yarmarkalar shólkemlestirilgen bolıp, ónimler xalıqqa qolaylı bahalarda satılmaqta.
Keyingi barǵan mánzilimiz “Al-kafil biznes plast” JShJ bolıp, bul kárxana tek ǵana rayonnıń ishki bazarın emes, al qońsı rayonlar menen qońsı wálayatlardı da óz ónimleri menen támiyinlep kelmekte. Búgingi kúnde kárxanada 15 ke shamalas jumıssız puqaralar jumıs penen támiyinlengen. Kárxana baslıǵı, isbilermen Allabergan Yornazarov óz jumısın 2019-jılı baslaǵan bolıp, Xalıq banki tárepinen ajıratılǵan 37 mıń AQSh dolları muǵdarındaǵı jeńilletilgen kredit esabınan Qıtay Xalıq Respublikasınan plastmassa ónimlerin islep shıǵarıwshı úskeneler alıp kelgen. Házirgi waqıtta jámiyetke qaraslı cexta xalıqtıń kúndelikli turmısı ushın paydalanılatuǵın 10 nan aslam túrdegi, hár qıylı kólemdegi xojalıq plastmassa buyımları islep shıǵarılmaqta.
-Bul jerde jumıs islep atırǵanıma bir jılǵa shamalastı. Ózim suw bashok islep shıǵaratuǵın stanokta turaman. Kúnine 200 den aslam suw bashok islep shıǵarıladı. Is haqılarımız waqtında berilmekte. Jumıssız úyde otırǵan waqtımda usı jumıs tabılǵanında quwanıshlı boldım,-deydi kárxanada jumıs islewshi Zulfiya Yusupova.
Media-tur sheńberinde jáne bir dıqqatqa ılayıq tárepi – bul úlgili qıytaq jer iyeleriniń tájiriybesi menen tanısıwımız boldı. Rayonda kóplegen shańaraqlar óz qıytaq jerlerinen nátiyjeli paydalanıp, nál tárbiyası, palız ónimlerin jetistiriwdi tabıslı shólkemlestirgen. Bul bolsa tek ǵana shańaraqlıq dáramat deregi emes, al awıllıq jerlerde turaqlı bántlikti támiyinlewdiń úlgisi sıpatında bahalanadı.
-Napaqada bolǵanımız benen hesh qashan qarap otırmaǵanbız,-deydi Jayhun APJ turǵını Uǵıljan Haytjanova. –Shańaraq aǵzalarımız benen birgelikte úy qaptalındaǵı qıytaq jerimizdiń bes sotıx jerine qıyar egip qoyǵan bolsaq, eki gektar jerinde nál jetistirip atırmız. Bul jumıslardı jolǵa qoyıw ushın hákim járdemshisiniń járdemi menen 2022-jılı 30 million sum bankten jeńilletilgen kredit aldıq. «Háreketke, bereket»,-degenindey dáramatımız jaqsı. Jaqında qıyarlarımızdan ónim alıp baslaymız hám bazarǵa shıǵaramız. Sonday-aq, palız ónimleriniń nállerin jetistirip, satıwǵa shıǵarıp baslaymız. Usı jerdiń arqasında ballarımızdı oqıtıp, úylendirip toylar berip, jaqsı turmıs keshirip atırmız. Adam erinsheklikten qutılıp, miynet etse kóplegen jetiskenliklerge erisedi.
Jaqında «Amu plaza» shańaraqlıq kárxana tárepinen iske túsirilgen miymanxana turmısı menen tanısıp, ol jerdegi miymanlarǵa jaratılǵan qolaylıqlardı kórdik.
-Bul miymanxanamız 27 orınǵa mólsherlengen bolıp, 3 mlrd qarjı esabınan qurıp pikerildi. Bes adamnıń bántligin támiyinledik. Miymanxanamız dárbent joldıń boyında jaylasqanlıqtan tiykarınan turistlerge xızmet kórsetip kelmektemiz. Ol ushın imkaniyatlarımız jeterli,-deydi miymanxana is júrgiwshisi S.Abduraimov.
Ámiwdárya rayonında bolıp atırǵan unamlı ózgerisler, bul aymaqta isbilermenlik ortalıǵınıń janlanıp atırǵanınan derek beredi.
Media-tur juwmaǵında jurnalistler tárepinen kórilgen obektler hám ol jerdegi jumıs unamlı bahalanıp, bunday baslamalar pútkil respublika boylap keńnen en jaydırılıwı kerek ekenligi atap ótildi.
Biz kórip gúwası bolǵanımızday, isbilermenlerdiń jumısın jolǵa qoyıwda mámleket tárepinen kórsetilgen járdem, atap aytqanda, subsidiyalar hám jeńilletilgen kreditler úlken járdem bolǵan. Búgin olar ózleri jaratqan jumıs orınları arqalı basqa da puqaralarǵa jańa úmit, jańa imkaniyatlar baǵıshlamaqta. Bul álbette jaqsı nátiyje.

G.Turdıshova, Qaraqalpaqstan xabar agentligi