Qaraqalpaqstanda 24 puqaranıń turaq jayǵa bolǵan huqıqları tán alındı.
«Ózbasımshalıq penen iyelep alınǵan jer uchastkalarına jáne olarda qurılǵan imarat hám qurılmalarǵa bolǵan huqıqlardı tán alıw haqqında»ǵı Nızamnıń 4-11-statyalarına bola dáslepki huqıqlar tán alındı.
– Ózbekstan Respublikası Prezidentiniń 2023-jılǵı «Qaraqalpaqstan Respublikası xalqın sociallıq qollap-quwatlaw hám fizikalıq tárepler jaǵınan qurılǵan turaq jaylarǵa bolǵan huqıqlardı tán alıw haqqında»ǵı pármanına muwapıq respublikamızdaǵı 27590 turaq jaydıń ijara hám múlk huqıqları tán alınǵan edi. Prezidentimiz tárepinen 2024-jıl 5-avgust kúni «Ózbasımshalıq penen iyelep alınǵan jer uchastkalarına jáne olarda qurılǵan imarat hám qurılmalarǵa bolǵan huqıqlardı tán alıw haqqında»ǵı nızamǵa qol qoyıldı. Ózbekstan kadastr agentligi tárepinen grafik tiykarında xatlaw jumısları adıp barılıp, dáslepki nátiyjelerge erisildi,-deydi Mámleketlik kadastrlar palatası Qaraqalpaqstan Respublikası basqarmasınıń jámiyetshilik penen baylanıslar boyınsha bas qánigesi Paraxat Ájimuratov.
Atap aytqanda, Shımbay, Kegeyli, Taxtakópir, Qaraózek hám Ámiwdárya rayonlarındaǵı, jámi 24 turaq jaydıń iyeleri tolıq iyelik huqıqın qolǵa kirgizdi. Endi bul puqaralar óz múlklerine nızamlı túrde iyelik etetuǵın boldı.
Nızam menen puqaralar hám isbilermenlerdiń múlkke bolǵan huqıqları tán alınadı, puqaralar arasındaǵı múlkshilik, sonday-aq, miyraslar menen baylanıslı dawlarǵa sheshim tabıladı. Bunnan tısqarı, xalıqtıń sociallıq máseleleri (turaqlı dizimge qoyıw, materiallıq járdem alıw, mektep, baqshaǵa jaylastırıw) jáne imarat hám obektlerdi kommunallıq tarmaqlarǵa jalǵaw boyınsha máseleleri sheshiledi.
Nızam talaplarınıń orınlanıwın támiyinlew maqsetinde elimizdiń barlıq aymaqlarında Mámleketlik kadastrlar palatasınıń qánigeleri tárepinen máhállelerde xatlaw jumısları dawam etpekte. Xatlaw nátiyjelerine muwapıq hár bir obekt haqqında maǵlıwmatlar hám komissiya juwmaqları etirof.kadastr.uz sistemasına kirgizilip barılmaqta.
2025-jıl 18-aprel kúngi maǵlıwmatqa bola, Qaraqalpaqstan Respublikasında 80 máhállede 19 mıń 349 turaq jay hám turaq jay emes obektler xatlawdan ótkerilip, 7854 obekt avtomatlastırılǵan málimleme sistemasına kirgizildi. Sonnan, 5375 obekt komissiyada hám 2479 obekt jámiyetshilikke járiyalanǵan.
Qaraqalpaqstan Respublikası Joqarǵı Keńesiniń sessiya qararı menen Shımbay, Kegeyli, Taxtakópir, Qaraózek hám Ámiwdárya rayonlarındaǵı 24 turaq jay iyeleriniń ózbasımshalıq penen hám artıqsha iyelegen jerlerine, olarda qurılǵan turaq jaylarına ijara hám múlk huqıqları tán alındı.
Mámleketlik kadastrlar palatası tárepinen bul baǵdardaǵı ilajlar dawam etpekte.
Á.Jiyemuratov,
Qaraqalpaqstan xabar agentligi