Ózbekstan Respublikası Prezidenti «Qarızdarlıq esabınan bankler balansına alınǵan múlklerdiń realizaciyasın jedellestiriw ilajları haqqında» qarar qabılladı.

Oǵan muwapıq, múddeti ótken qarızdarlıqtı óndiriw mexanizmlerin jetilistiriw hám bank balansındaǵı háreketsiz múlklerdi satıw imkaniyatların arttırıw arqalı banklerdi qarjılay salamatlandırıw hám qaytqan qarjı resurs esabınan isbilermenlik subektleriniń jumısın qarjılandırıw maqsetinde banklerdiń balansındaǵı háreketsiz múlkler úlesin azaytıw, sonıń ishinde, 2025-2026-jılları keminde 4 trillion sumlıq usı túrdegi múlklerdi satıw belgilendi.
2025-jıl 1-maydan baslap ustav fondında mámleketlik úlesi 50 procent hám onnan artıq bolǵan banklerge hám olardıń janındaǵı investiciya kompaniyalarına aukcionda satılmastan qarızdarlıqlardı sóndiriw esabınan bank balansına alınǵan múlklerdi bazar bahasında tikkeley satıwǵa, sonıń ishinde, kredit, bólip-bólip tólew, lizing shártnamaları yamasa nızamshılıq hújjetlerinde qadaǵan etilmegen basqa da kelisimler arqalı satıwǵa ruqsat etiledi.
Kommerciyalıq banklerge qarızdarlıqlardı sóndiriw esabınan bank balansına qabıl etilgen imarat-obektler, texnologiyalıq úskeneler hám basqa da múlkler tiykarında kommerciyalıq bankler janındaǵı investiciyalıq kompaniyalar arqalı toqtap qalǵan óndiris (xızmet kórsetiw) jumısın tiklep, olardı tayar biznes sıpatında potenciallı investorlarǵa satıw huqıqı beriledi.

ÓzA