Kitap jańalıǵı

Elimizdiń rawajlanıwı, abadan turmısta jasawı jolında qanshada-qansha márt hám dana ata-babalarımız pidayılıq penen miynet etip, xalqımız yadında máńgige mórlenip qalǵan. Tariyxımızda xalqımız ardaqlaǵan kóplegen tariyxıy tulǵalar jasap ótken. Olardıń basıp ótken ómir jolı búgingi áwlad ushın sabaq bolıp tabıladı.
Altındı qansha ısqılasań sonsha jıltıraǵanınday, sol tulǵalar haqqında qansha eslewler kóp aytılsa olardıń qádir-qımbatı sonsha arta beredi.
Jaqında «Jeti Iqlim» baspası XIX-XX ásirde jasap ótken ájayıp insanlardıń ómirinen kitap oqıwshıları burın bilmegen eske túsiriwler berilgen «Belgili insanlar ómirinen eske túsiriwler» atlı kitabın basıp shıǵardı.
Kitapta Aydos biy, Oraz Muhammed atalıq, Áwezjan xoja, Nájim Dáwqaraev, Allayar Dosnazarov, Ayapbergen Muwsaev, Izbasar Fazılov, Ibrayım Yusupov, Ayımxan Shamuratova hám xalqımızdıń tariyxı tuwralı belgili ádebiyatshı, tariyxshı, etnograf ilimpazlar hám shayırlardıń eske túsiriwleri berilgen.
Kitap xalqımızdıń ruwxıy dúnyasın bayıtıwda áhmiyetli oqıw qollanba boladı degen úmittemiz.

Adilbay Orazov,
Qaraqalpaqstan xabar agentligi sholıwshısı.