Usı jıldıń 17-19-aprel kúnleri Qaraqalpaqstan aktiv turistlik orayına aylandırılıp, xalıqaralıq Aral turizmi hápteligi sheńberinde respublikada áhmiyetli ilajlardıń ótkeriliwi rejelestirilgen.

Dáslep 17-aprel kúni qatnasıwshılar ushın Nókis qalasındaǵı I.V.Savickiy atındaǵı muzeyge hám basqa da tariyxıy orınlarǵa sayaxat shólkemlestiriw belgilengen.
Hápteliktiń 2-kúninde «Aralboyı jaqsı niyet elshileri» xalıqaralıq ilimiy-ámeliy konfrenciyası hám «Open-air» koncert baǵdarlamasınıń ótkeriliwi rejelestirilgen.
19-aprel kúni «10000 qádem» jámiyetlik joybarı, «Nál egiw» akciyası, sporttıń «Badminton» túri boyınsha jarıs hám «Aral balıqlarınan 99 túrli taǵam» gastronomiyalıq festivalın ótkeriw názerde tutılǵan.
Ózbekstan Respublikası Ekologiya, qorshaǵan ortalıqtı qorǵaw hám klimat ózgerisi ministrligi, Qaraqalpaqstan Respublikası Joqarǵı Keńesi hám Turizm komiteti tárepinen shólkemlestirilip atırǵan bul ilajlar, álbette, regionnıń turizm potencialın úgit-násiyatlaw, ekologiyalıq hám mádeniy miyraslardı saqlaw, sonıń menen birge, xalıqaralıq birge islesiwdi bekkemlewge qaratılǵanlıǵı menen áhmiyetli.

Qaraqalpaqstan xabar agentligi.