Házirgi kúnleri Kosovo Respublikasında EGMO – 2025 – Evropa Qızlar Matematika Olimpiadası bolıp ótpekte.
Bul Olimpiadaǵa dúnya júziniń 55 mámleketten 300 ge shamalas oqıwshı qızlar qatnaspaqta.

Atap aytqanda, xalıqaralıq dárejede ótkerilgen bul olimpiadaǵa mámleketimiz boyınsha tórt oqıwshı qatnasıp, onda qızlarımız úlken tabısqa eristi.
Respublikamız keń jámiyetshiligi ushın áhmiyetli tárepi sonda, usı jeńimpazlar qatarında Nókis qalasındaǵı 1-sanlı qánigelestirilgen mekteptiń 9-klass oqıwshısı Malika Xojamuratova ta bar.
Malikanıń bul jetiskenligi tek mekteptiń pedagogikalıq jámáátiniń ǵana emes, al, pútkil Qaraqalpaqstan hám Ózbekstan jaslarınıń tabısı boldı.
-Oqıwshımız bunnan aldın da bir neshe márte xalıqaralıq Olimpiadalarǵa qatnasıp, 2023-jılı Tashkent qalasında ótkerilgen Al-Xorezmiy xalıqaralıq olimpiadasında matematika páninen 3-orındı iyelegen edi,-deydi Nókis qalasındaǵı 1-sanlı qánigelestirilgen mekteptiń direktorı Marat Ibrayımov.-Al, ótken jılı bolsa, Malika Xojamuratova informatika páninen Niderlandiyada ótkerilgen xalıqaralıq Olimpiadaǵa da Ózbekstan Respublikası saylandı komandası aǵzaları quramında qatnasıwǵa eristi. Pursattan paydalanıp, mektebimiz jámááti atınan oqıwshımız Malika Xojamuratova hám onıń ustazı Zarafshan Abdirashidovanı erisken tabısı menen qutlıqlayman. Olardıń aldaǵı oqıwları hám jumıslarına tasqın tabıslar tileymen.

Adilbay Orazov,
Qaraqalpaqstan xabar agentligi sholıwshısı.