Senattıń Agrar, suw xojalıǵı máseleleri hám ekologiya komitetiniń májilisinde «Íssıxana gazleriniń shıǵarılıwın sheklew haqqında»ǵı Nızam dáslepki tárizde dodalandı.

Onda ıssıxana gazlerin shıǵarıwdı azaytıw nátiyjesinde payda bolatuǵın uglerod birlikleri aylanısın ámelge asırıwdıń tártibin belgilew hám ıssıxana gazleri shıǵarılıwı ústinen qadaǵalawdı támiiynlewge itibar qaratılǵan.
Íssıxana gazleriniń shıǵarılıwın sheklewdiń tiykarǵı principleri, onıń monitoringi, esabatı hám verifikaciya sisteması tiykarları, tártibi, qısqartılǵan ıssıxana gazlerine iyelik etiw huqıqları belgilenbekte.
Nızamnıń qabıl etiliwi elimizde klimat ózgeriwi boyınsha alıp barılıp atırǵan reformalardı jedellestiriw, qorshaǵan ortalıqtı hám ekologiyanı jaqsılaw jáne ekonomikanı turaqlı rawajlandırıwǵa zárúr sharayat jaratıwǵa xızmet etedi.
Májiliste «Ózbekstan Respublikasınıń ayırım nızam hújjetlerine qosımsha hám ózgerisler kirgiziw haqqında»ǵı Nızam da dodalandı.
Nızam menen Jer kodeksine suwǵarılatuǵın jerlerdi basqa kategoriyaǵa ótkeriw boyınsha talaplardı kúsheytiwdi názerde tutatuǵın qosımshalar hám ózgerisler kirgizilmekte. Sonıń ishinde, kategoriyası ózgertilgen jerlerden keleshekte paydalanıw boyınsha anıq shártler belgilenbekte, jer uchastkasın alǵanı hám jerden paydalanǵanı ushın haqı boyınsha qarızdarlıq 6 ay ishinde saplastırılmasa, jerge bolǵan huqıqtı biykarlaw názerde tutılmaqta.
Jer uchastkaların alǵan yuridikalıq hám fizikalıq tárepler elektron onlayn-aukcion nátiyjelerine bola yamasa bahalawshı shólkem tárepinen belgilenetuǵın muǵdarda haqı tólew, sonday-aq, awıl xojalıǵı hám toǵay xojalıǵı óndirisindegi ısırapgershiliklerdiń ornın qaplawı shárt ekeni belgilenbekte.
Bunnan tısqarı, Hákimshilik juwapkershilik haqqındaǵı kodekske jer astı suwlarına qudıqtı nızamsız burǵılaǵanı ushın juwapkershilikti belgileytuǵın, jer astı suwlarınan qadaǵalawsız hám esapsız paydanlanǵanı ushın juwapkershilikti kúsheytetuǵın ózgerisler hám qosımshalar kirgizilmekte.

Bunnan tısqarı, májlis kóleminde xalıq deputatları jergilikli Keńesleriniń Agrar, suw xojalıǵı hám ekologiya máseleleri boyınsha komissiyaları aǵzaları ushın oqıw seminar ótkerildi.
Seminarda turaqlı komissiyalardıń jumıs nátiyjeliligin nátiyjeli shólkemlestiriw, olardıń tiykarǵı baǵdarları boyınsha anıq rejelerdi belgilew, wákillikler sheńberinde áhmiyetli máselelerdi dodalaw hám anıq nátiyjelerge erisiw boyınsha tájiriybe almasıldı.
Awıl xojalıǵın reformalaw hám rawajlandırıw, azıq-awqat qáwipsizligin támiyinlew, eginlerdi suwǵarıwda suwdı únemleytuǵın texnologiyalardı engiziw hám tarawda jańa jumıs orınların jaratıw, qorshaǵan ortalıqtı qorǵaw, payda bolıp atırǵan mashqalalardı óz waqtında sheshiw boyınsha usınıslar islep shıǵıw sıyaqlı wazıypalar belgilep alındı.
Senatorlar, ministrlik hám uyımlardıń wákilleri qatnasqan seminarda jergilikli keńeslerdiń turaqlı komissiyalarınıń aǵzaları óz pikir-usınısların bildirdi.

Norgul ABDURAIMOVA,
ÓzAnıń xabarshası