Ózbekstan delegaciyası quramında Sanlı texnologiyalar ministrligi administraciyası Amerika Qurama Shtatlarına xızmet saparın ámelge asırmaqta.

Sapar sheńberinde Nyu-York qalasındaǵı BMSh Bas rezidenciyasında májilis shólkemlestirildi. Onda 2025-jıldıń 23-25-iyun kúnleri Samarqand qalasında ótkeriliwi rejelestirilip atırǵan BMSh Mámleketlik xızmetler forumı («UN Public Service Forum –2025»)na tayarlıq jumısları hám Ózbekstanda tarawında ámelge asırılıp atırǵan reformalar boyınsha prezentaciya bolıp ótti.
Májiliste bul forum BMSh strukturaları, xalıqaralıq shólkemler hám hár qıylı mámleketlerdiń ministrleri qatnasatuǵın joqarı dárejedegi plenar sessiyalar, ámeliy seminarlar hám Ózbekstan tájiriybesin kórsetiwshi milliy keysler prezentaciyası menen bayıtılǵan iri xalıqaralıq hám abıraylı ilajǵa aylanatuǵını atap ótildi.
Sonday-aq, ilajda basqa mámleketlerdiń joqarı mártebeli wákilleriniń forumda qatnasıwı, atap aytqanda, Nyu-Yorktaǵı BMShtıń turaqlı wákilleri menen jolǵa qoyılǵan birge islesiw máseleleri dodalandı.
Forumnıń tek ǵana mámleketlik shólkemler emes, al ilimiy-akademiyalıq toparlar, xalıqaralıq hám regionallıq shólkemler, IT -kompaniyalar hám puqaralıq jámiyetiniń wákillerin de qamtıp alıwı áhmiyetli ekeni ayrıqsha atap ótildi.
Ilaj sońında BMSh Bas xatkeriniń járdemshisi Navid Xanif tárepinen Ózbekstanda ámelge asırılıp atırǵan izbe-iz reformalar, elektron húkimetti engiziw hám mámleketlik xızmetler sapasın arttırıw baǵdarındaǵı ilajlar joqarı bahalandı. Sonday-aq, Ózbekstan Oraylıq Aziyadaǵı aldıńǵı reformalar úlgisi sıpatında atap ótildi. Forumnıń Samarqandta ótkeriliwi mámleketimizdiń xalıqaralıq maydanda kún sayın artıp atırǵan abırayınıń jáne bir mısalı sıpatında atap ótildi.

N.Rahmonova, ÓzA