Ájiniyaz atındaǵı Nókis mámleketlik pedagogikalıq institutında Ruwxıylıq hám aǵartıwshılıq keńesiniń májilisi bolıp ótti. Ilajda institutta ruwxıy-aǵartıwshılıq baǵdarındaǵı jumıslardıń nátiyjeliligin arttırıw, jaslarda joqarı ádep-ikramlılıq qádiriyatlardı qáliplestiriw hám jámiyette ruwxıy ortalıqtı jaqsılawǵa baylanıslı áhmiyetli máseleler dodalandı.

Májilisti institut rektorı, Ruwxıylıq hám aǵartıwshılıq keńesiniń baslıǵı Q.Qodirov basqarıp bardı, – dep maǵlıwmat beredi NMPI Baspasóz xatkeri I.Mátekov.
Tarawda júz berip atırǵan mashqalalar hám ámelge asırılıp atırǵan jumıslar kórip shıǵılıp, aldaǵı wazıypalar atap ótildi.
Student-jaslardıń arasında hár qıylı jat ideyalar, zıyanlı illetler, jınayatshılıq hám huqıqbuzarlıqlardıń aldın alıw boyınsha ámelge asırılatuǵın jumıslardıń anıq mexanizmlerin islep shıǵıw hám úgit-násiyat jumıslarınıń nátiyjeli usıllarınan paydalanıwdıń áhmiyeti atap ótildi.
Atap ótilgen ilajlar boyınsha juwapkerlerge tapsırmalar berildi.
Sonday-aq, keńes aǵzalarınan ibarat arnawlı topar shólkemlestirilip, fakultetler kesiminde tiyisli úyreniw hám úgit-násiyatlaw jumısların alıp barıwǵa kelisip alındı.
Májiliste bildirilgen pikir-usınıslar tiykarında qararlar qabıl etildi.

Qaraqalpaqstan xabar agentligi