Ózbekstan Respublikası mektepke shekemgi hám mektep bilimlendiriwi ministri Hilola Umarova basshılıǵındaǵı delegaciya Saudiya Arabstanı paytaxtı Ar-Riyod qalasında bolıp ótken “Human Capability Initiative 2025” xalıqaralıq forumında qatnastı.

Miyrasxor shaxzada, Bas ministr Muhammad bin Salmon bin Abdulaziz Ol Saudtıń baslaması menen shólkemlestirilgen ánjuman insan faktorı, bilimlendiriw, ekonomika, texnologiyanı rawajlandırıw sıyaqlı áhmiyetli máselelerdı dodalaw ushın qolaylı maydan bolıp esaplanadı. Iri mámleketler, abıraylı xalıqaralıq shólkemler, biznes hám ilimiy toparlardıń wákilleri arasında Ózbekstan Oraylıq Aziyadan birden-bir mámleket sıpatında kóringeni respublikamızda júz berip atırǵan reformalarǵa xalıqaralıq dárejede berilip atırǵan joqarı bahadan dárek beredi.
Forum sheńberinde delegaciyamız Islam rawajlanıw banki baslıǵı Muhammad Al-Jassar menen ushırasıp, 40 million dollarlıq grant kelisimine eristi. Sonday-aq, “Global Partnership for Education” (GPE) xalıqaralıq shólkemi menen de tiyisli hújjetke qol qoyıldı.
Sırt el qarjısı pútkil respublika boylap 58 zamanagóy mektep qurıw, oqıw mákemelerin zamanagóy ásbap-úskene menen úskenelew, pedagoglardıń mamanlıǵın arttırıw, inklyuziv hám mektepke shekemgi bilimlendiriwdi rawajlandırıw hám oqıw baǵdarlamasın jetilistiriwden ibarat keń kólemli joybarlarǵa baǵdarlanadı.

Aziza Alimova, ÓzA