Prezidentimizdiń baslaması menen elimiz boylap ámelge asırılıp atırǵan qıytaq jerlerden nátiyjeli paydalanıwdı shólkemlestiriw arqalı xalıqtıń bántligi hám dáramatların arttırıwǵa qaratılǵan jumıslardı jáne de jedellestiriw maqsetinde orınlarda bir qatar ilajlar ámelge asırılmaqta.

Qanlıkól rayonındaǵı Arzımbetqum awıl puqaralar jıyını turǵını S.Ótepbergenovtıń shańaraǵı qulpınay jetistiriw menen shuǵıllanıp kelmekte.
Rayon hákimi B.Sultanov usı shańaraqta bolıp, qulpınay ósimligin jetistiriw onı jáne de keńeytiw jumısları menen tanıstı.
Atap ótilgenindey, Prezidentimizdiń 2024-jıl 30-dekabrdegi “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında”ǵı qararı tiykarında atız shetlerine, kanallar, kollektor-drenaj tarmaqları átirapındaǵı maydanlarǵa eksportqa qolaylı eginlerdi egiw áhmiyetli wazıypa etip belgilendi.
Sonday-aq, xalıqqa tiyisli qıytaq jerlerde, xojalıqlardıń hám kóp qabatlı turaq jaylardıń aldılarında, máhállelerdiń ishki kóshelerinde awıl xojalıǵı ónimlerin jetistiriwdi nátiyjeli shólkemlestiriw hám kóbeytiw arqalı mámlekettiń eksport kórsetkishlerin arttırıw maqsetinde wazıypalar da belgilendi.
Úy qaptalı uchastkasında 3 gektar jer maydanǵa jeterli qulpınay náli jetistirilgen.
Rayon hákimliginiń qollap-quwatlawı menen S.Ótepbergenovqa tájiriybe sınaw usılında aymaqtaǵı «Dáryabay qaqsabın» femer xojalıǵınan jáne qosımsha 3 gektar jer ajıratıldı.
Házirgi waqıtta bul jer maydanı nál otırǵızıwǵa tayarlanbaqta.

Qaraqalpaqstan xabar agentligi.