Paytaxtımızda jaylasqan Nókis «Muhammad ibn Axmad al Beruniy» orta arnawlı islam bilimlendiriw ornınıń jazǵı sport maydanshasında mini-futbol boyınsha «Qazıyat kubogi» jarısınıń final basqıshı bolıp ótti.

Jarısqa respublikamızdıń barlıq aymaqlarınan diniy tarawda oqıwshı hám islewshi xızmetkerlerden dúzilgen háwesker komandalar qatnastı.
Kubok ushın ótken qızǵın bellesiwler juwmaǵında, Nókis qalası «Muhammad ibn Ahmad al Beruniy» orta arnawlı islam bilimlendiriw ornınınıń «Doslıq» komandası birinshi orındı jeńip alıp, «Qazıyat kubogi»niń iyesine aylandı.
Al, jarısqa belsene qatnasqan Taxtakópir hám Qaraózek rayonlarında jasawshı diniy xızmetkerlerden dúzilgen «Dáwqara» komandası ekinshi, Nókis qalası diniy xızmetkerlerinen dúzilgen «Aral» komandası úshinshi orın jeńimpazı boldı.
Jarıs juwmaǵında Qaraqalpaqstan Respublikasi Ministrler Keńesi baslıǵı orınbasarı R.Nurazizov hám Qaraqalpaqstan musılmanları qazıyatı qazısı B.Razovlar jarıs qatnasıwshıların jeńisleri menen qutlıqlap, aldaǵı waqıttaǵı jumıslarında tabıslar tiledi hám jeńimpaz komandalar menen jaqsı oyın kórsetken futbolshılarǵa Qaraqalpaqstan Respublikası Ministrler Keńesi, Qaraqalpaqstan musılmanları qazıyatı hám «Vaqf» qayırqomlıq jámáátlik fondı tárepinen estelik sawǵaları tapsırıldı.

Adilbay Orazov,
Qaraqalpaqstan xabar agentligi sholıwshısı