Búgin Berdaq atındaǵı Qaraqalpaq mámleketlik akademiyalıq muzıkalı teatrında «Mádeniyat hám kórkem óner xızmetkerleri kúni» múnásibeti menen saltanatlı bayram keshesi bolıp ótti.

Bayram ilajında «Túrksoy» xalıqaralıq túrkiy mádeniyat shólkeminiń bas xatkeri Sultanbay Raev, dúnyaǵa belgili franciyalı dirijyor Natali Maren hám basqa da miymanlar qatnastı.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.
Atap ótilgenindey, sońǵı jılları elimizde húrmetli Prezidentimizdiń basshılıǵında mádeniyat hám kórkem óner tarawın rawajlandırıwǵa, taraw xızmetkerlerine qolaylı sharayatlar jaratıwǵa hám olardıń xızmetlerin múnásip bahalawǵa ayrıqsha itibar qaratılıp, bul baǵdarda keń kólemli jumıslar ámelge asırılmaqta.
Ótken qısqa dáwir ishinde tarawǵa baylanıslı bir qatar nızam, párman hám qararlardıń qabıl etilgeni bul baǵdardaǵı ilajlar kólemin jańa basqıshlarǵa kótermekte.
Haqıyqatında da, ázelden kѳrkem ѳner hám mádeniyat insanlardı bárqulla jaqsılıqqa, iygilikli islerge baslap kelgen. Óytkeni, jámiyettiń rawajlanıwında, kóp milletli xalqımızdıń ruwxıy dúnyasın bayıtıwda, ásirese, elimizdi dúnyaǵa tanıtıwda mádeniyat hám kѳrkem ѳnerdiń tutqan ornı ayrıqsha esaplanadı.
Ótkerilgen saltanatlı ilaj dawamında búgingi bayram múnásibeti menen elimiz mádeniyatın dúnyaǵa tanıtıwda qosqan úlesi ushın «Túrksoy» xalıqaralıq túrkiy mádeniyat shólkeminiń xızmetkerleri, elimizdiń bir qatar taraw pidayılarına Qaraqalpaqstan Respublikası Joqarǵı Keńesi tárepinen xoshametlew sıylıqları tapsırıldı.
Sonday-aq,Túrkiy xalıqlar mádeniyatı hám kórkem ónerin rawajlandırıwdaǵı xızmetleri ushın Qaraqalpaqstan Respublikası mádeniyat ministri Begisbay Temirbaev hám «Ayqulash» qaraqalpaq mámleketlik milliy folklor ansmabliniń qosıqshısı Gúlxatiysha Ayımbetova «Túrksoy» xalıqaralıq túrkiy mádeniyat shólkeminiń medalı, Qaraqalpaq mámleketlik Jas tamashagóyler teatrınıń rejisyori Sultanbek Qallibekov hám teatr aktyorları Rasul Tilemisov hám Gúlchehra Jafarovalar minnetdarshılıq xatı hám estelik sawǵaları menen sıylıqlandı.
-Meniń azı-kem islegen miynetimdi bahalaǵanı ushın tarawımız hám respublikamız basshılarına úlken raxmet aytaman,-deydi «Watan pidayısı» kókirek belgisiniń iyesi Berdaq atındaǵı Qaraqalpaq mámleketlik akademiyalıq muzıkalı teatrınıń aktyorı Alisher Akimov.-Bul xoshamet bizlerdey jas dóretiwshilerdi jańasha islew hám izleniwge umtıldıradı. Aldaǵı waqıtları ózlerimizge bildirilgen isenimdi tolıq aqlap, jańa dórtepelerimizdi xalqımızǵa usına beremiz.
Bayram kóterińki ruwxta dawam etti.

Qaraqalpaqstan xabar agentligi