“Yuksalish” háreketiniń baslaması menen 2019-jıldan berli elimiz boylap “Bir million terek” ulıwma milliy akciyası ótkerip kelinbekte. Akciyanıń maqseti — toǵaylardı kesiw hám klimat ózgeriwi tásirine qarsı gúresiw, adamlardı birlestiriw arqalı tereklerdi kóbeytiw hám ósiriw máselelerine itibardı tartıwdan ibarat. Bul joybar jılına eki márte gúzgi hám báhárgi máwsimlerde ótkerilip barılmaqta.

“Yuksalish” háreketi tárepinen “Huawei” kompaniyasınıń járdemi menen usı jıl 14-aprel kúni Moynaq rayonındaǵı Bozataw APJnıń “Shaǵırlı” awılında jaylasqan 13-sanlı mektepke shekemgi bilimlendiriw mákemesi hám “Aq keme” balalar jazǵı dem alıw orayı átirapına respublikamızda ótip atırǵan “Jasıl mákan” ulıwma milliy joybarı, “Bir million terek” akciyası sheńberinde alma, erik, shabdal, almurt, qáreli sıyaqlı miyweli tereklerdi egiӯ jumısları alıp barıldı.
Ilajda rayon hákimi B.Menglibekov, «Yuksalish» háreketi Qaraqalpaqstan Respublikası aymaqlıq bóliminiń baslıǵı T.Romanovlar hám basqalar shıǵıp sóylep, bul ilajdıń áhmiyetine keńnen toqtap ótti.
Bıyıl akciya sheńberinde sociallıq obektlerge de itibar qaratılmaqta. Usı jerde “Huawei” kompaniyası bir neshe jıldan berli jasıl aymaqlardı keńeytiwde “Yuksalish” penen birge islesip kiyatırǵanın atap ótiw zárúr.
– Miyweli nállerdi otırǵızıw ushın mektepke shekemgi bilimlendiriw mákemesi hám balalar dem alıw orayı aymaǵın tańlaǵanımız biykarǵa emes. Sebebi, bul nárse tek ǵana ekologiyalıq emes, al tárbiyalıq áhmiyetke de iye. Balalar bir terekti egip, miywe bergenge shekem insannan kúsh hám miynet talap etetuǵınına gúwa boladı hám bul olarda tábiyatqa abaylı bolıw kónlikpelerin qáliplestiredi, degen úmittemiz. “Yuksalish” háreketi hár jılı usınday baslamalardı ámelge asırıp, jasıl aymaqlardı keńeytiwge úles qosıwda dawam etedi,-deydi “Yuksalish” háreketi baslıǵınıń orınbasarı J.Turaxanov.
“Yuksalish” háreketiniń “Huawei” kompaniyası menen birge islesiwi nátiyjesinde sońǵı jıllarda Tashkenttegi Jazıwshılar qıyabanı, Respublikalıq balalar sociallıq beyimlesiw orayı, paytaxttaǵı 20 dan aslam mektepte, Doslıq baǵı, Tashkent wálayatı Bostanlıq rayonı, Balalar milliy medicina orayı, Tashkent Xalıqaralıq bilimlendiriw universitetinde terekler egildi.
– Texnologiyalıq kompaniya sıpatında, biz energetikalıq jaqtan nátiyjeli innovaciyalardı qollanıw – turaqlı keleshek jaratıwdıń tiykarǵı principi, dep esaplaymız. Biz turaqlı túrde uglerodsız ekonomikaǵa ótiwdiń optimal usılların úyrenip, izertlewler hám rawajlanıwǵa investiciya kirgizemiz. Jasıl texnologiyalardı engiziwden tısqarı, klimat ózgerisleriniń aqıbetlerine qarsı gúresiwde sherikler hám jámiyetshilik penen birge islesiwdiń áhmiyetin jaqsı túsinemiz.
Sonlıqtan, “Jasıl Ózbekstan” baslamamızdı dawam ettirip, 2020-jıldan baslap ekologiyalıq jaǵdaydı jaqsılawǵa óz úlesimizdi qosıwǵa háreket etip atırmız,-deydi “Huawei” kompaniyasınıń jámiyetlik baylanıslar boyınsha menedjeri A.Nabieva.
“Yuksalish” háreketi tárepinen ámelge asırılıp atırǵan “Bir million terek” akciyası aymaqlardı kóklemzarlastırıwǵa úles qosıp ǵana qalmastan, jámiyette ekologiyalıq sana-sezim hám tábiyatqa abaylı qatnas sıyaqlı qádiriyatlardı qáliplestiredi. Hár qıylı áwlad wákilleri, ásirese, ósip kiyatırǵan jaslardı tartıw arqalı bul baslama turaqlı keleshek ushın bekkem tiykar boladı.
Nál otırǵızıw jumıslarında “Yuksalish” háreketi, “Huawei” kompaniyası, mámleketlik emes kommerciyalıq emes shólkemler, volontyorlar, Moynaq rayonı hákimshiligi, belsendi puqaralar hám ǵalaba xabar qurallarınıń wákilleri belsene qatnastı.
Egilgen nállerdiń keyingi ósip rawajlanıwına qaraw jumısların Moynaq rayonı, Bozataw APJ “Shaǵırlı” awılında jaylasqan 13-sanlı mektepke shekemgi bilimlendiriw mákemesi adminstraciyası óz juwapkershiligine aldı.
“Yuksalish” tárepinen ámelge asırılıp atırǵan bul akciya hár qanday áwlad wákilleri, ásirese, ósip kiyatırǵan jaslardı tartıw arqalı turaqlı keleshek ushın bekkem tiykar jaratadı.
Maǵlıwmat ushın, “Yuksalish” háreketi tárepinen qorshaǵan ortalıqtı qorǵaw hám tábiyatqa abaylı qatnasta bolıw ideyaların úgit-násiyatlaw maqsetinde 2019-jıldan berli mámlekettiń túrli aymaqlarında 4 millionnan aslam miyweli hám sayamanlı terek nálleri hám putalar egiwge erisilgen.

Á.Jiyemuratov,
Qaraqalpaqstan xabar agentligi.