Oliy Majlis Senatına Evroparlamenttiń Oraylıq Aziya mámleketleri menen baylanıslar boyınsha delegaciyasınıń baslıǵı Tomash Zdexovskiy basshılıǵındaǵı Evropa parlamenti delegaciyası keldi.

Senat Baslıǵı Tanzila Norboeva menen ushırasıwda eki tárepleme birge islesiwdiń házirgi jaǵdayı hám perspektivaları dodalandı.
Siyasiy sóylesiwdiń joqarı dárejesi hám parlamentleraralıq baylanıslardıń keńeyip barıwı dinamikası atap ótildi.
Ótken háptede Tashkent qalasında bolıp ótken Parlamentleraralıq Awqamnıń 150-yubiley assambleyasınıń juwmaqlarına ayrıqsha itibar qaratıldı. Onda Evropanıń 18 mámleketinen delegaciyalar qatnasqanı atap ótildi.
Ózbekstan Respublikası Prezidenti Shavkat Mirziyoevtiń xalıqaralıq kólemde keń túrde atap ótilip atırǵan shıǵıp sóylegen sózi joqarı bahalandı.
Sonday-aq, 4-5-aprel kúnleri Samarqand qalasında bolıp ótken «Oraylıq Aziya – Evropa Awqamı» birinshi sammitiniń juwmaqları da kórip shıǵıldı.
Erisilgen kelisimler, sonıń ishinde, Tashkent qalasında Evropa investiciya bankiniń regionallıq wákilxanasın ashıw zárúr ekenligi atap ótildi.
Ushırasıw juwmaqları boyınsha tárepler Oliy Majlis Senatı hám Evropa parlamenti arasındaǵı parlamentleraralıq sóylesiwdi jáne de tereńlestiriwden mápdar ekenligin tastıyıqladı.
***
Senatta «Ózbekstan – Evropa Awqamı» parlament birge islesiwi komitetiniń 18-májilisi de ótkerildi. Onda birge islesiwdi jáne de keńeytiw hám bekkemlewge qaratılǵan tiykarǵı baǵdarlar dodalandı.
Oraylıq Aziya mámleketleri hám Evropa Awqamı arasındaǵı birge islesiw sezilerli dárejede jedelleskeni atap ótildi. 2025-jıl 4-5-aprel kúnleri Samarqand qalasında ótkerilgen «Oraylıq Aziya – Evropa Awqamı» birinshi sammiti onıń ayqın kórinisi boldı. Sammit nátiyjeleri eki region arasındaǵı qatnasıqlardı jańa, strategiyalıq dárejege alıp shıqqanı menen ayrıqsha áhmiyetke iye.
Ózbekstan hám Evropa Awqamı arasındaǵı ekonomikalıq birge islesiwdi bekkemlew, isbilermenlikti qollap-quwatlaw, óz-ara investiciyalıq ortalıqtı jaqsılaw hám bilimlendiriw tarawındaǵı «Erasmus+» baǵdarlaması arqalı ózbekstanlı jaslardıń Evropa mámleketlerinde oqıw imkaniyatların keńeytiw zárúr ekenligi atap ótildi.
Evropa Awqamı mámleketleriniń kiberjınayatshılıqqa qarsı gúresiwdegi tájiriybesin úyreniw, málimleme qáwipsizligin támiyinlewde birge islesiw máseleleri kórip shıǵıldı.
Májiliste ekologiyalıq turaqlılıqtı támiyinlew, atap aytqanda, Aralboyı regionında ekologiyalıq krizis aqıbetlerin jumsartıw boyınsha birge islesiw perspektivaları dodalandı. Suw resursların nátiyjeli basqarıw, regionallıq ekologiyalıq joybarlardı ámelge asırıw boyınsha birgeliktegi baslamalar bildirildi.
Evropa Awqamınıń wákilleri Ózbekstanda insan huqıqların qorǵaw, nızam ústinligi, puqaralıq jámiyetin rawajlandırıw, gender teńlikti támiyinlew hám hayal-qızlardıń jámiyetlik-siyasiy turmıstaǵı qatnasın keńeytiwge qaratılǵan reformalardı joqarı bahaladı.
Májilis sońında «Ózbekstan – Evropa Awqamı» parlament birge islesiwi komitetiniń gezektegi májilisin 2026-jıldıń birinshi yarımında ótkeriwge kelisip alındı.

N.Abduraimova, ÓzA