Sońǵı jılları elimizde barlıq tarawlar sıyaqlı joqarı bilimlendiriw tarawında da mámleketimizde hám sırt ellerdegi joqarı oqıw orınları menen hár tárepleme birge islesiw baǵdarında kóplegen unamlı jumıslar alıp barmaqta. Sonıń ishinde, respublikamızdaǵı eń iri joqarı oqıw esaplanǵan Berdaq atındaǵı Qaraqalpaq mámleketlik universiteti tárepinen de bul boyınsha bir qatar unamlı isler ámelge asırılıp kiyatır.

14-aprel kúni Namangan mámleketlik texnika universiteti delegaciyası, ximiya ilimleriniń doktorı, professor Oybek Karimovich Ergashev basshılıǵındaǵı professor-oqıtıwshılar hám qábiletli studentler Berdaq atındaǵı Qaraqalpaq mámleketlik universitetinde boldı.
Namanganlı miymanlar universitet rektoratı tárepinen kútip alındı.
Ushırasıw dawamında eki joqarı bilimlendiriw mákemesi arasında ilimiy-izertlewler, innovaciyalıq joybarlar, professor-oqıtıwshılar hám studentlerdiń akademiyalıq mobilligin jolǵa qoyıw sıyaqlı baǵdarlarda birge islesiwdi bunnan bılay da bekkemlew máseleleri dodalandı.
Qaraqalpaq mámleketlik universiteti basshıları Namangan mámleketlik texnika universiteti delegaciyasınıń xızmet saparı hám baslap atırǵan iygilikli baslamaların qollap-quwatlaytuǵınlıǵın atap ótip, bunday ushırasıwlar eki aymaq arasındaǵı ilimiy hám mádeniy baylanıslardı bekkemlewde áhmiyetli faktor bolıp xızmet etetuǵınlıǵına toqtaldı.
Sonıń ishinde, búgingi kúni eki joqarı oqıw ornı arasında bilimlendiriw, ilim hám ekologiya tarawlarındaǵı birge islesiw jańa basqıshqa kóterilmekte. Bul baǵdardaǵı baslamalardan biri – Qaraqalpaq mámleketlik universiteti aymaǵında qurılǵan «Ilim-aǵartıwshılıq baǵı» bolıp, bul baǵ Namangan mámleketlik texnika universitetiniń baslaması jaratıldı.
Baǵda 100 túpten aslam sayamanlı terek nálleri hám 500 túpten aslam túrli gúller egildi. Áhmiyetli tárepi sonda, bul gúller hám náller Namangan mámleketlik texnika universitetiniń laboratoriyası hám innovaciyalıq ıssıxanasında jetistirilip, jumıs procesinde namanganlı ilimpazlar tárepinen islep shıǵılǵan gidrogel texnologiyasınan paydalanıldı. Bul texnologiya suwdı únemlew hám ósimliklerdi nátiyjeli tárbiyalawda joqarı nátiyje berip, baǵdı tek ǵana sulıw emes, al ekologiyalıq jaqtan da gózzal mákanǵa aylandıradı.
Jańa baǵdıń ashılıw máresiminde eki universitettiń basshıları, professor-oqıtıwshılar, studentler hám ǵalaba xabar qurallarınıń wákilleri qatnastı.
Ilajda shıǵıp sóylewshiler tárepinen bul baǵdıń jaratılıwı – bilimlendiriw, ilim hám ekologiyalıq mádeniyattıń óz-ara baylanıslılıǵın kórsetedi , dep atap ótti.
– «Ilim-aǵartıwshılıq baǵı» – bul tek ǵana gúller hám terekler egilgen aymaq emes. Bul – jas áwlad ushın tárbiya ornı, jámiyetimizde ekologiyalıq mádeniyattı qáliplestiretuǵın oqıw-tárbiya maydanı. Baǵda hár bir gúl, hár bir terek ilimniń, miynet hám birge islesiwdiń tımsalı. Bizdi quwandıratuǵın tárepi – gidrogel texnologiyası sıyaqlı zamanagóy kózqaraslar ámeliyatta óz ornın tawıp atır. Bunday baslamalar arqalı biz tek ǵana tábiyatqa emes, al keleshek áwladtıń sanasına da tásir kórsetip atırmız,-deydi Berdaq atındaǵı Qaraqalpaq mámleketlik universitetiniń rektorı, akademik Axmed Reymov.
Ilaj dawamında Namangan mámleketlik texnika universiteti Qaraqalpaq mámleketlik universiteti rektoratına 64-xalıqaralıq gúller festivalında qatnasıw ushın rásmiy mirátnamanı saltanatlı túrde tapsırdı.
Bul usınıs tek ǵana dástúriy doslıq baylanısların bekkemlep qoymastan, al universitetler arasındaǵı ilimiy-ámeliy birge islesiwdiń jańa basqıshın belgilep beredi. Álbette, “Ilim-aǵartıwshılıq baǵı” sıyaqlı baslamalar elimizdegi joqarı bilimlendiriw mákemeleri arasındaǵı birge islesiw, ilim jetiskenlikleriniń ámeliyatqa engiziliwi hám qorshaǵan ortalıqqa juwapkershilikli qatnastı qáliplestiriwde úlken áhmiyetke iye bolıp tabıladı.
«Ilim-aǵartıwshılıq baǵı» tek ǵana tábiyatqa itibar emes, al jas áwlad qálbinde bilim, ilim hám doslıq qádriyatların bekkemlew, jaslardı ana Watanǵa mehir, ekologiyalıq mádeniyatqa húrmet ruwxında tárbiyalawǵa xızmet etedi. Namangan texnika universiteti professor-oqıtıwshıları hám qábiletli studentleriniń bul sapar etiwi eki joqarı oqıw ornı arasındaǵı birge islesiw baylanıslarınıń jańa basqıshqa kóterilgeninen dárek beredi. Keleshekte birgeliktegi ilimiy joybarlar, startaplar hám studentler almasıwı baǵdarlamaları arqalı birge islesiw jáne de rawajlanadı.

Adilbay Orazov,
Qaraqalpaqstan xabar agentligi sholıwshısı.