Jaqında Qıtaydıń Usi qalasında qılıshlasıw boyınsha jas óspirimler hám jaslar arasındaǵı jáhán chempionatı bolıp ótip, onda Ózbekstan qızlar hám erler saylandı komandası sıylı 3-orındı iyeledi.

13-aprel kúni Nókis xalıqaralıq aeroportında Jáhán chempionatında múnásip qatnasqan Berdaq atındaǵı Qaraqalpaq mámleketlik universitetinıń Dene mádeniyatı fakulteti studentleri G.Perdebaeva, A.Jumamuratova, I.Abdazov, M.Aymuratovlardı saltanatlı kútip alıw máresimi bolıp ótti.
Kútip alıw máresiminde respublika húkimeti aǵzaları, oqıw ornı basshıları, sportshınıń ata-anları, jankúyerleri, student jaslar hám ǵalaba xabar quralları xızmetkerleri qatnastı.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Qaraqalpaqstan Respublikası Sport ministri E.Qutıbaev, Berdaq atındaǵı Qaraqalpaq mámleketlik universiteti rektorı, akademik A.Reymovlar sportshılarımızdı qolǵa kirgizgen úlken tabısı menen qutlıqlap, aldaǵı oqıwları hám xalıqaralıq jarıslarda bunnan da joqarı nátiyjelerge erisiwinde tilekleslik bildirdi.
-Sońǵı jılları elimizde Prezidentimizdiń basshılıǵında sport tarawın rawajlandırıwǵa ayrıqsha itibar qaratılıp, búgingi kúni respublikamız jasları xalıqaralıq jarıslar hám chempionatlarda úlken tabıslardı qolǵa kirgizip kelmekte. Bunıń ayqın kórinisin, grek-rim gúresi boyınsha Aziya chempionlıǵın jeńip alǵan Jalǵasbay Berdimuratov, boks boyınsha jáhán kuboginiń qola medalı iyesi Daniyar Madiyarov hám búgingi qılıshpaz qız-jigitlerimiz mısalında kórsek boladı,-deydi jas qılıshpaz Gúlistan Perdebaevanıń anası filiologiya ilimleriniń doktorı, professor Tamara Masharipova.-Jaslarımızdıń erisken jetiskenligin qollap-quwatlaw maqsetinde, Nókis xalıqaralıq aeroportına kútip alıw ushın kelgen respublikamız húkimeti aǵzaları, universitet basshıları, sport jankúyerleri hám pidayılarına úlken raxmet aytaman.
Ilajda jeńimpaz sportshılar hám olardıń trenerleri de shıǵıp sóylep, ózlerine kórsetilip atırǵan usınday ǵamqorlıq hám itibar ushın, shólkemlestiriwshilerge raxmet aytıp, aldaǵı ótkeriletuǵın jarıslarda da mámleketimiz bayraǵın joqarılarda jelbiretiwge háreket etetuǵınlıǵın bildirdi.

Adilbay Orazov,
Qaraqalpaqstan xabar agentligi sholıwshısı.